პირველი ოქტომბრის არჩევნების შემდგომ საქართველოში არსებული პოლიტიკური სიტუაცია, გერმანიასა და საქართველოს შორის ურთიერთობის გაღრმავება, საქართველოს ტერიტორიული მთლიანობა და ევროპული ინტეგრაცია იყო საქართველოს პარლამენტის თავმჯდომარის, დავით უსუფაშვილისა და გერმანიის ფედერალური რესპუბლიკის პარლამენტის წევრის, ვიოლა ფონ კრამონ-ტაუბადელისის დღევანდელი შეხვედრის ძირითადი საკითხები.
დავით უსუფაშვილის განცხადებით, ვიოლა ფონ კრამონ-ტაუბადელისი საქართველოს უკვე რამდენჯერმე ესტუმრა. თბილისის გარდა, მან მოინახულა რამდენიმე რეგიონი: სოხუმი, ბათუმი და ზუგდიდი.
„ჩვენ ვისაუბრეთ იმ პროგრესზე, რომელსაც საქართველომ მიაღწია ბოლო პერიოდში, პირველი ოქტომბრის შემდეგ განვითარებულ მოვლენებზე და ვთანხმდებით იმაზე, რომ ჩვენს ქვეყნებს შორის მეგობრობა კვლავაც გაგრძელდება", - განაცხადა დავით უსუფაშვილმა.
უსუფაშვილი მიიჩნევს, რომ გერმანელი პოლიტიკოსები ყველაფერს გააკეთებენ იმისთვის, რომ საქართველოს შესახებ სწორი ინფორმაცია ვრცელდებოდეს ევროპაში და ევროპელმა მოქალაქეებმა ადეკვატურად შეაფასონ საქართველოში მიმდინარე მოვლენები.
ვიოლა ფონ კრამონ-ტაუბადელისის განცხადებით, კი ეს იყო ძალიან საინტერესო, მნიშვნელოვანი და ნაყოფიერი შეხვედრა.
„მოსაზრებები გავცვალეთ საქართველოში არსებული პოლიტიკური მდგომარეობის შესახებ. უნდა აღინიშნოს ის პროგრესი, რომელიც პირველი ოქტომბრის არჩევნების შემდეგ ქვეყანაში შეინიშნება. ევროკომისარმა ფულემ თავის განცხადებაშიც აღნიშნა, რომ პროგრესი ცალსახად ფიქსირდება", - განაცხადა ვიოლა ფონ კრამონ-ტაუბადელისმა.
მისივე განცხადებით, გერმანია მხარს უჭერს საქართველოს ევროატლანტიკურ მისწრაფებებს. ვიოლა ფონ კრამონ-ტაუბადელისმა იმედი გამოთქვა, რომ ვილნიუსში დაგეგმილ სამიტზე ასოცირების ხელშეკრულების შესახებ მოლაპარაკების დასკვნითი ეტაპი შედგება.