"ლეიბორისტული პარტიის" ერთ-ერთი ლიდერი გიორგი გუგავა მიიჩნევს, რომ მთავრობის რეიტინგი დღითიდღე კატასტროფულად ეცემა. როგორც მან "პრაიმ-ტაიმის" პრესკლუბში გამართულ პრესკონფერენციაზე აღნიშნა, არ ხდება იმის 1%-ის შესრულებაც კი, რასაც მმართველი გუნდი მოსახლეობას არჩევნების წინ შეპირდა.
"ეს ერთ-ერთი ფაქტორი იქნება კოალიციის დაშლის, მაგრამ ასევე, ერთ-ერთი ფაქტორი იქნება მიზიდულობის ძალა, რაც საფუძველი გახდება მათი ჩამომსხვრევის. ისევე, როგორც იმსხვრევა მოსახლეობის ოცნებები და ეს დღე შორის არ არის", - განაცხადა გუგავამ.
მისი თქმით, კოალიციაში შემავალი "რესპუბლიკური პარტია" იყო მთავარი იდეოლოგი, როდესაც 2003 წელს საქართველოში ახალი ხელისუფლება მოიყვანეს. გუგავას განცხადებით, "რესპუბლიკური პარტია" ის ძალაა, რომელიც "პრაქტიკულად, ყველა ლიდერის, ყველა ოლიგარქის საწოლში ნებივრობდა".
"როცა ვერ კმაყოფილდებოდნენ გამორბოდნენ და ახალ ოლიგარქს ეძებდნენ. ისინი შავი ყორნებივით დასტრიალებენ ქართულ საზოგადოებას. "რესპუბლიკელები" იყვნენ, როცა ამტკიცებდნენ, რომ აფხაზეთს ჰქონდა თვითგამორკვევის უფლება და მათი სურვილი ახდა კიდეც", - განაცხადა გუგავამ.
მისივე თქმით, საზოგადოებამ "რესპუბლიკური პარტია" პოლიტიკურ ცხოვრებას უნდა ჩამოაცილოს.
