უკვე მეოთხე დღეა გაგრაში სასმელი წყალი არ არის. სტიქიამ 650 მეტრიანი მილი წალეკა, რომელიც ქალაქს სასმელი წყლით ამარაგებდა. ძლიერი ქარის გამო გაგრაში მომხდარი ხუთბალიანი შტორმის შედეგად ტალღების სიმძლავრე სამნახევარ მეტრს აღწევდა. შედეგად სანაპირო ზოლში მდებარე რამდენიმე სახლი დაიტბორა.
გაგრის რაიონის ე.წ. ხელმძღვანელი გრიგორი ენიკი აცხადებს, რომ წყალმომარაგების აღდგენის სამუშაოები უკვე მიმდინარეობს, თუმცა შესაძლოა მათ კიდევ რამდენიმე დღე დასჭირდეს.
ამას გარდა, ძლიერი ქარის შედეგად ბიჭვინთაში დატბორილია 14 სახლი. ენიკის ინფორმაციით, ქალაქში სასმელი წყალი ჩააქვთ.
მისივე თქმით, ადგილობრივები აცხადებენ, რომ ასეთი შტორმი 1967 წლიდან არ ახსოვთ.
