PSP-ს დამფუძნებელი კახა ოქრიაშვილი "ნიუ ჰოსპიტალის" წინააღმდეგ აგორებული კამპანიის ორგანიზატორების დასჯას ითხოვს. როგორც კახა ოქრიაშვილმა, სააგენტო "ჯი-ეიჩ-ენთან" საუბრისას განმარტა, ის ინფორმაცია რაც მედიის საშუალებით გავრცელდა სიმართლეს არ შეესაბამება და ეს ყველაფერი "ნიუ ჰოსპიტალის" წინააღმდეგ დაგეგმილი კამპანიაა.
"ეს ქალბატონი, რომელმაც ეს აჟიოტაჟი ატეხა არის ყოფილი ბრალდებული, ყოფილი ნარკორეალიზატორი. თუ შესაძლებელია ნამუსის გადანერგვა ამ ქალბატონს სწორედ ნამუსის გადანერგვა მოუხდებოდა და იმ ჟურნალისტებს ვინაც ეს ინფორმაცია აიტანეს უნდა ტვინი გადაენერგოთ, ეს არის ჩემი კომენტარი. ზუსტად თუ რა ჩივილებით შემოვიდა ეს ქალბატონი კლინიკაში ამაზე ინფორმაცია შეგიძლიათ კლინიკიდან მიიღოთ. თუმც ჩვნ არ შეგვიძლია მისი თანხმობის გარეშე მის დაავადებაზე ვისაუბროთ. აქედან გამომდინარე ამ ქალბატონს არანაირი ფილტვის კიბო არ ქონდა, ქონდა ჩრდილი და როგორც მე ვიცი აპირებდნენ ფუქნციის გაკეთებას. ეს არის კამპანია ვიღაცის მიერ დაგეგმილი და ჩვენ აუცილებლად ვიპოვით იმ პიროვნებას, რომელმაც ეს ყველაფერი დაგეგმა და ის კანონის მიხედვით დაისჯება"- აღნიშნა კახა ოქრიაშვილმა.
როგორც ცნობილია, კომპანიამ უკვე მიმართა შრომის, ჯანმრთელობისა და სოციალური დაცვის სამინისტროს, რათა "ნიუ ჰოსპიტალსში" სამედიცინო საქმიანობის სახელმწიფო რეგულირების სააგენტოს კომისია შევიდეს და ყველაფერი დეტალურად შეისწავლოს. როგორც კახა ოქრიაშვილი განმარტავს, კომისია სამედიცინო დაწესებულებაში აუცილებლად შევა, რათა სიმართე გაირკვეს.
შეგახსენებთ, რომ "ნიუ ჰოსპიტალის" დირექტორმა ნიკა ოქრიაშვილმა 14 მარტს მეცხრე არხზე გასულ სიუჟეტთან დაკავშირებით განცხადება უკვე გაავრცელა. სიუჟეტში საუბარი იყო იმაზე, რომ შპს "ნიუ ჰოსპიტალსში" მსჯავრდებულებს არასწორ მკურნალობა ჩაუტარდა.
"ჩვენ ვეხმაურებით 14/03/2013 მეცხრე არხზე გასულ სიუჟეტს შპს "ნიუ ჰოსპიტალსში" მსჯავრდებულების არასწორი მკურნალობის შესახებ, რომელიც აბსოლუტურად არ შეესაბამება სიმართლეს. ვთვლით, რომ ეს არის დაგეგმილი და მიზანმიმართული კამპანია ნიუ ჰოსპიტალსის როგორც საავადმყოფოს რეპუტაციის შელახვის მიზნით. ხაზგასმით უნდა აღინიშნოს, რომ აღნიშნული საკითხის ირგვლივ არ ჩატარებულა ჟურნალისტური გამოძიება და არ იქნა მოსმენილი პაციენტის მკურნალი ექიმების აზრი, გამოტანილი დასკვნები არ ემყარება ობიექტურ რეალობას. ამასთან, არც ერთ ჩვენს ყოფილ პაციენტს არ მოუმართავს ჩვენთვის რაიმე კითხვით, თუნდაც საპატიმროდან გათავისუფლების შემდეგ.
მთელი პასუხისმგებლობით ვაცხადებთ, რომ "ნიუ ჰოსპიტალსში" შემოსული ნებისმიერი პაციენტი გადის საფუძვლიან სადიაგნოსტიკო კვლევებს და ამ კვლევების შედეგების საფუძველზე და პაციენტის კლინიკური მდგომარეობის შესაბამისად უტარდება თანამედროვე გაიდლაინების შესაბამისი, მაღალი ხარისხის მკურნალობა. ყოველი პაციენტის ავადმყოფობის ისტორია მკაცრად დოკუმენტირებულია. ვთვლით, რომ ტელეკომპანია მეცხრე არხის ჟურნალისტებს ბევრად მეტი პასუხისმგებლობა და პროფესიონალიზმი მართებთ მსგავსი, გადაუმოწმებელი ინფორმაციის გავრცელებისას.
ჩვენ ოფიციალური წერილით მივმართავთ საქართველოს შრომის, ჯანმრთელობისა და სოციალური დაცვის სამინისტროს და მოვითხოვთ, გამოიგზავნოს ნიუ ჰოსპიტალსში სამედიცინო საქმიანობის სახელმწიფო რეგულირების სააგენტოს კომისია, რათა შესწავლილ იქნას აღნიშნული პაციენტის ავადმყოფობის ისტორია, ჩვენს მიერ განხორციელებული სამკურნალო-სადიაგოსტიკო ქმედებები და დაიდოს ოფიციალური დასკვნა, რომლითაც დამტკიცდება, რომ მასობრივი ინფორმაციის საშუალებებით გავრცელებული ინფორმაცია არ შეესაბამება სინემდვილეს. ჩვენ ასევე მივმართავთ საქართველოს მთავარ პროკურატურას ცრუ დასმენასთან დაკავშირებით აღიძრას საქმე სისხლის სამართლის კოდექსის 373-ე მუხლის შესაბამისად და მიეცნენ კონკრეტული პირები პასუხისგებაში ნიუ ჰოსპიტალსის და მისი ექიმებისათვის განსაკუთრების მძიმე დანაშაულის ჩადენის დაბრალებისათვის.
ასევე მივმართავთ საქართველოს სახალხო დამცველს ბატონ უჩა ნანუაშვილს, რადგან ვთვლით, რომ აღნიშნული რეპორტაჟით მოხდა ჩვენი საავადმყოფოს და მისი მედ.პერსონალის რეპუტაციის უსაფუძვლო ხელყოფა. მივმართავთ ტელეკომპანია მეცხრე არხის ადმინისტრაციას და ვითხოვთ მათი მხრიდან გავრცელებული ინფორმაციის უარყოფას და ბოდიშის მოხდას", - აცხადებს ნიკა ოქრიაშვილი.