ერთიან ეროვნულ გამოცდებზე აბიტურიენტთა რეგისტრაცია აპრილის პირველი რიცხვებიდან დაიწყება.
გამოცდების ეროვნული ცენტრის ხელმძღვანელის მაია მიმინოშვილის ინფორმაციით, "უმაღლესი განათლების შესახებ" კანონში რამდენიმე ცვლილება შედის, რომელიც პარლამენტმა მიმდინარე სასესიო კვირას უნდა დაამტკიცოს.
"უმაღლესი განათლების შესახებ" კანონში ცვლილებები უკვე შეტანილია პარლამენტში. პირველი მოსმენით უკვე გაიარა პროცედურა და ძალიან დიდი იმედი მაქვს, რომ ამ კვირის ბოლოს უკვე დასრულდება ყველაფერი, მაგრამ მიუხედავად ამისა, პარალელურად ჩვენ უკვე მონაცემები შევაგროვეთ უმაღლესი სასწავლებლებიდან და წარმატების შემთხვევაში აპრილის პირველი რიცხვებიდან უკვე დავიწყებთ რეგისტრაციას", - განაცხადა მიმინოშვილმა.
ცვლილებების მიხედვით, წელს სტუდენტთა საგრანტო დაფინანსება იზრდება და სახელმწიფო უმაღლეს სასწავლებლებში ბაკალავრიატის რამდენიმე წამყვანი მიმართულების 14 სპეციალობაზე სწავლა უფასო იქნება.
აბიტურიენტებს ასევე, საშუალება ექნებათ შედეგების გამოცხადების შემდეგ, აპელაციის დაწყებამდე არჩეული სპეციალობა შეცვალონ.
