"საერთაშორისო გამჭვირვალობა - საქართველოში" გურჯაანისა და დედოფლისწყაროს გამგებლების დანიშვნას კანონდარღვევად აფასებენ.
როგორც "საერთაშორისო გამჭვირვალობის" განცხადებაშია ნათქვამი, 11 მარტს ტელეკომპანია „მაესტრომ" გაავრცელა სიუჟეტი, რომლის მიხედვითაც, გურჯაანისა და დედოფლისწყაროს მუნიციპალიტეტის საკრებულოებმა გამგებლები კონკურსის ჩატარების გარეშე დანიშნეს.
"მიგვაჩნია, რომ ამ ქმედებებით საქართველოს კანონმდებლობა დაირღვა და საკრებულოს მიერ მიღებული გადაწყვეტილებების გაუქმებაა საჭირო. გამგებელი ადგილობრივი თვითმმართველობის საჯარო მოხელეა, რომელსაც „საჯარო სამსახურის შესახებ" საქართველოს კანონის შესაბამისად, საკრებულოს თანხმობით, თანამდებობაზე საკრებულოს თავმჯდომარე ნიშნავს", - აცხადებენ ორგანიზაციის წარმომადგენლები.
მათივე თქმით, ამავე კანონის თანახმად, პირი თანამდებობაზე მხოლოდ კონკურსის შედეგად შეიძლება დაინიშნოს, გარდა კანონის 30-ე მუხლში ჩამოთვლილი შემთხვევებისა.
ორგანიზაციის წარმომადგენლების განმარტებით, აღნიშნული მუხლი გამგებლისთვის გამონაკლისს არ ადგენს, შესაბამისად, გამგებლის დანიშვნისთვის კონკურსის ჩატარების აუცილებლობა უდავოა.
"ნათელია, რომ სახეზე საკრებულოების მხრიდან კანონმდებლობის მნიშვნელოვანი დარღვევა გვაქვს, რის შედეგადაც, ეჭვის ქვეშ დგება როგორც გამგებლების უფლებამოსილება, ასევე მათ მიერ გამოცემული ყველა სამართლებრივი აქტის კანონიერება", - ნათქვამია განცხადებაში.
"საერთაშორისო გამჭვირვალობის" წევრები გურჯაანისა და დედოფლისწყაროს მუნიციპალიტეტის საკრებულოებს გამგებლების დანიშვნის შესახებ გამოცემული უკანონო აქტების გაუქმებისკენ მოუწოდებენ.