როგორც ორგანიზაციის განცხადებაშია ნათქვამი, შს მინისტრის 2013 წლის 25 იანვრის #39 ბრძანებით, პოლიციაში ზოგიერთი საკადრო საკითხის მარეგულირებელი წესი შეიცვალა.

კერძოდ, შესაძლებელი გახდა საპატრულო პოლიციის დეპარტამენტის ოცმეთაურის ან უფრო მაღალი თანამდებობის პირის და რამდენიმე სხვა მნიშვნელოვან თანამდებობაზე პროფესიული საგანმანათლებლო პროგრამისა და გადამზადების კურსების გავლის გარეშე პირთა დანიშვნა ან დაწინაურება.

ორგანიზაციაში მიაჩნიათ, რომ აღნიშნული წესის ცვლილება პირის პოლიციის თანამშრომლად ყოველგვარი წინასწარი მომზადების და სათანადო გამოცდის გარეშე დანიშვნის ან დაწინაურების შესაძლებლობას წარმოქმნის.

„მინისტრის ბრძანება 2013 წლის 31 მარტის ჩათვლითაა ძალაში. მიუხედავად იმისა, რომ ბრძანება შეზღუდული პერიოდით მოქმედებს, იგი მნიშვნელოვან რისკებს წარმოქმნის. კერძოდ, არსებობს საფრთხე, რომ პოლიციაში ამ პერიოდში თანამდებობებზე დაინიშნონ პირები, ვინც შესაბამის სტანდარტებსა და მოთხოვნებს არ აკმაყოფილებენ", - აცხადებენ ორგანიზაციის თანამშრომლები.

მათივე თქმით, ასევე, ჩნდება ლეგიტიმური კითხვები, თუ რატომ შეიძლება გამხდარიყო საჭირო პროფესიული საგანმანათლებლო პროგრამებისა და გადამზადების კურსების გავლაზე დროებით უარის თქმა.

„საერთაშორისო გამჭვირვალობა" სამინისტროს სისტემაში მიმდინარე რეფორმებს მიესალმება, თუმცა აქვე უნდა აღინიშნოს, რომ შესაძლოა გარკვეულმა ნაჩქარევმა ქმედებებმა რეფორმის მიმდინარეობის პროცესს ზიანი მიაყენოს ან რეფორმა დადებით შედეგამდე არ მიიყვანოს. პოლიციის რეფორმასთან ერთად საგანმანათლებლო პროგრამების განახლებაც უნდა მოხდეს", - ნათქვამია ორგანიზაციის განცხადებაში.

ამასთან, „საერთაშორისო გამჭვირვალობის" წარმომადგენლების თქმით, აღნიშნული პროცესი ისე უნდა წარიმართოს, რომ სამინისტროს საქმიანობის ხარისხს ზიანი არ მიადგეს და საზოგადოებაში კითხვები ან ნეგატიური დამოკიდებულება არ გაჩნდეს.