ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ დღეს დევნილთა განსახლების კრიტერიუმების პრეზენტაცია გამართა. მინისტრის პირველმა მოადგილემ - გოგი ფაცაციამ დევნილ მოსახლეობას, არასამთავრობო სექტორს, საერთაშორისო დონორ ორგანიზაციებსა და საელჩოების წარმომადგენლებს ის დოკუმენტი წარუდგინა, რის მიხედვითაც მოხდება დევნილი მოსახლეობისთვის საცხოვრებელი ბინების განაწილება.
დღემდე სამინისტროს მსგავსი კრიტერიუმები არ გააჩნდა. კრიტერიუმები იგივე ქულების სისტემაა, რომელიც დევნილი ოჯახის საჭიროების შეფასებისას დაჯამდება. დევნილი ოჯახი, რომელიც მეტ ქულას დააგროვებს, პრიორიტეტი ენიჭება. სწორედ აღნიშნული კრიტერიუმების გათვალისწინებით მოხდება დევნილი ოჯახებისათვის საცხოვრებელი ფართების განაწილება, იქნება ეს ახლადაშენებული, რეაბილიტირებული შენობები თუ სხვა საცხოვრებელი ბინები და სახლები.
მაგალითად, მაღალი ქულით შეფასდება კომპაქტურად (ორგანიზებულად) განსახლების იმ ობიექტებში მაცხოვრებელი დევნილები, რომელი შენობებიც ავარიულია, საფრთხეს უქმნის იქ მაცხოვრებელთა სიცოცხლეს და ჯანმრთელობას, ან დღეის მდგომარეობით არ არის და არც შეიძლება იყოს ადაპტირებული საცხოვრებელ ფართებად; გრძელვადიანი განსახლების შეთავაზებისას მნიშვნელობა ენიჭება ჯანმრთელობის მდგომარეობიდან გამომდინარე სპეციალურ საჭიროებებს; სულადობას; საომარ მოქმედებებში მონაწილეობდა თუ არა და სხვა საკითხებს.
როგორც გოგი ფაცაციამ აღნიშნა, აღნიშნული დოკუმენტი არის გარანტია იმისა, რომ საცხოვრებელი ფართის განაწილება მოხდება სამართლიანად და გამჭვირვალედ: "როდესაც ბინების განაწილება კრიტერიუმების შესაბამისად მოხდება, სამართლიანობა და ობიექტურობა გარანტირებული იქნება. გამოირიცხება ყოველგვარი პერსონალური, ან სხვა მანკიერი პრაქტიკა, რომელიც ახლდა ბინების განაწილებას წინა პერიოდებში. ყველას ეცოდინება, ვინ რატომ მიიღო მასზე ადრე ბინა და უსამართლობის განცდა არ იქნება."
აღნიშნული დოკუმენტის შემუშავებაში მონაწილეობდნენ ოკუპირებული ტერიტორიოებიდან იძულებით გადაადგილებულ პირთა, განსახლებისა და ლტოლვილთა სამინისტროს პარტნიორები: დანიის ლტოლვილთა საბჭო; გაეროს უმაღლეს კომისარიატი ლტოლვილთა საკითხებში; ნორვეგიის ლტოლვილთა საბჭო და ახალგაზრდა იურისტთა ასოციაცია. გოგი ფაცაციამ მათ მადლობა გადაუხადა თანამშრომლობისათვის.
აღნიშნული დოკუმენტი სამინისტროსთან არსებულმა სამეთვალყურეო საბჭომაც განიხილა და დაამტკიცა. დევნილთა სამინისტროს სამეთვალყურეო საბჭო არის სათათბირო ორგანო, რომელიც წარმართავს დევნილთა მიმართ სახელმწიფო სტარტეგიის სამოქმედო გეგმის განხორციელებას. სამეთვალყურეო საბჭო კვარტალში ერთხელ იკრიბება. მის შემადგენლობაში შედიან ადგილობრივი და საერთაშორისო არასამთავრობო ორგანიზაციები, ასევე დონორები და პარტნიორი ორგანიზაციები, დიპლომატიური კორპუსის წარმომადგენლები და სამთავრობო უწყებები.