14 აპრილს "რეჟიმის გასამართლების მოთხოვნით" სპორტის სასახლეში აქცია გაიმართება, _აღნიშნულის შესახებ ,,ჯი-ეიჩ-ენთან" საუბარში ,,ყოფილი პოლიტპატიმრები- ადამიანის უფლებებისათვის" ხელმძღვანელმა ნანა კაკაბაძემ განაცხადა და აღნიშნა, რომ აქციის ორგანიზატორები ყოფილი პოლიტპატიმრები არიან.
,,აქციის ორგანიზატორები ყოფილი პოლიტპატიმრები იქნებიან, მაგრამ აქციაში მონაწილეობას ყველა ის ადამიანი მიიღებს ვინც მიჩნევს, რომ ,,ნაციონალური მოძრაობის" რეჟიმი უნდა გასამართლდეს", -განაცხადა კაკაბაძემ და აღნიშნა, რომ აქციის მიმდინარეობისას სააკაშვილის რეჟიმის გასამართლების მოთხოვნით ხელმოწერები შეგროვდება, რომელიც შემდეგ პარლამენეტს გადაეგზავნება.
,, ადგილზე ხელმოწერები შეგროვდება, რომელიც შემდეგ საკანონმდებლო ორგანოს გადაეგზავნება, რადგან ,,ნაციონალური მოძრობა" უნდა აიკრძალოს, ის კანონგარეშე უნდა გამოცხადდეს", _განაცხადა კაკაბაძემ.
მისივე განცხადებით აქცია რამდენიმე ტელევიზიის საშუალებით პირდაპირ ეთერში გადაიცემა, თუმცა კაკაბაძეს არ დაუკონკრეტებია რომელი ტელევიზიის საშუალებით მოხდება აქციის პირდაპირი ტრანსლირება.