წეროვანში კომპაქტურად ჩასახლებულ დევნილთა ხუთმა ოჯახმა 200 ლარიანი ვაუჩერი მიიღო, რომელთა გამოყენებასაც ისინი სააფთიაქო ქსელებში მედიკამენტების შეძენისას შეძლებენ. არასამთავრობო ორგანიზაციამ „ლიბერალური კვალი საქართველო" (LIBERAL FOOTPRINT GEORGIA) სპეციალური კვლევის შედეგად გამოავლინა წეროვანში მცხოვრები სოციალურად დაუცველი ოჯახები, რომელთა წევრებს შორისაც არიან ქრონიკული ავადმყოფობით დაავადებულნი. ორგანიზაციაში მიაჩნიათ, რომ მათ მიერ მედიკამენტების შესაძენად გამოყოფილი ვაუჩერი ამ ოჯახების მდგომარეობას გარკვეულწილად შეამსუბუქებს.
„ეს არის ჩვენი მოკრძალებული შესაძლებლობა, რითაც ამ ეტაპზე ვახერხებთ ხელი შევუწყოთ 2008 წლის ომის შედეგად დევნილებად ქცეულ ოჯახებს. მომავალშიც საქველმოქმედო საქმიანობა ჩვენი ორგანიზაციის ერთ-ერთ მთავარ მიმართულებად დარჩება" - ამბობს „ლიბერალური კვალი საქართველოს" წარმომადგენელი გიორგი ლაშხი.
არასამთავრობო ორგანიზაცია „ლიბერალური კვალი საქართველო" (LIBERAL FOOTPRINT GEORGIA) დიდ ბრიტანეთში ქართული ემიგრაციის მიერ დაფუძნებული ორგანიზაციაა. მისი მიზანია, კვლევითი, სამეცნიერო, საქველმოქმედო და სხვა არაკომერციული საქმიანობით ბრიტანეთში მცხოვრები ქართული ემიგრაციის წვლილი შეიტანოს საქართველოში სოციალური მდგომარეობის გაუმჯობესებაში. ასევე, სამოქალაქო და პოლიტიკური უფლებებისა და თავისუფლებების, საერთაშორისო სამართლით აღიარებული სხვა ფუნდამენტური უფლებების დაცვაში, რამაც საბოლოო ჯამში, ქვეყანაში კანონის უზენაესობის განცდის დამკვიდრებას, საზოგადოების სამართლებრივი ცნობიერების ამაღლებას და საქართველოსსამართლებრივ და ლიბერალურ სახელმწიფოდ ჩამოყალიბების უნდა შეუწყოს ხელი.