საჯარო ინფორმაციის ანალიტიკურ ბლოგზე წამებაში ეჭვმიტანილ პირთა პრემიების შესახებ ინფორმაცია გავრცელდა, საიდანაც ირკვევა, რომ 2011-2012 წლებში სასჯელაღსრულების დეპარტამენტის თავჯდომარე, გენერალ-მაიორ დავით ჭაკუა წახალისების სახით ყოველთვიურად იღებდა თანამდებობრივი სარგოს ორმაგ ოდენობას, ხოლო დეკემბრის თვეში (2011) აიღო ოთხმაგ ოდენობა - 10 080 ლარი.
რაც შეეხება, სასჯელაღსრულების დეპარტამენტის სხვა ყოფილ თანამშომელთა შესახებ გაუცემელ ინფორმაციას, სასჯელაღსრულების დეპარტამენტის მიერ უარის საფუძვლად მოყვანილ იქნა საკანონმდებლო ნორმათა ერთობლიობაზე მითითება.
"პირველ ასეთ ნორმად მითითებულ იქნა საქართველოს კონსტიტუცია. კერძოდ, საქართველოს 41-ე მუხლის მე-2 პუნქტი, რომლის თანახმადაც: „ოფიციალურ ჩანაწერებში არსებული ინფორმაცია, რომელიც დაკავშირებულია ადამიანის ჯანმრთელობასთან, მის ფინანსებთან და სხვა კერძო საკითხებთან, არავისათვის არ უნდა იყოს ხელმისაწვდომი თვით ამ ადამიანის თანხმობის გარეშე, გარდა კანონით დადგენილი შემთხვევებისა, როდესაც ეს აუცილებელია სახელმწიფო უშიშროების ან საზოგადოებრივი უსაფრთხოების უზრუნველსაყოფად, ჯანმრთელობის, სხვათა უფლებებისა და თავისუფლებების დასაცავად."
IDFI-ის მოსაზრებით, საჯარო დაწესებულებაში დასაქმებული საჯარო მოხელეების შესახებ ფინანსური ინფორმაცია (მ.შ. ხელფასები და პრემიები) არ უნდა წარმოადგენდეს მის „ფინანსებთან და კერძო საკითხებთან" დაკავშირებულ ინფორმაციას. გამომდინარე იქიდან, რომ არსებობს საჯარო ინტერესის მაღალი დონე მოხელეების საბიუჯეტო წყაროდან მიღებული ანაზღაურებისა თუ წახალისების მიმართ?- აღნიშნულია ბლოგზე განტავსებულ სტატიაში.
როგორც ცნობილია, საჯარო მოხელეთა თანამდებობრივი სარგოები ყველასათვის ხელმისაწვდომია, რადგან ისინი ქვეყნდება შესაბამისი ნორმატიული დოკუმენტების სახით. მაგ. საქართველოს სასჯელაღსრულების, პრობაციისა და იურიდიული დახმარების საკითხთა მინისტრის ბრძანებით №147 დადგენილია პატიმრობისა და თავისუფლების აღკვეთის აღსრულების სისტემის ორგანოთა მოსამსახურეების თანამდებობრივი სარგოები. სამართლებრივი აქტის მიხედვით, რომელიც ყველასთვის ხელმისაწვდომია საქართველოს საკანონმდებლო მაცნეს ვებ-გვერდზე, "ჩვენთვის ცნობილი ხდება, რომ დაწესებულების დირექტორის ყოველთვიური ხელფასი შეადგენს 2 705 ლარს, მისი მოადგილის 2 540 ლარს, უსაფრთხოების განყოფილების უფროსის 1 355 ლარს, ინსპექტორის (კონტროლიორის) 1 065 ლარს, დამხმარე მოსამსახურის (დამლაგებლის) 500 ლარს და ა.შ"- ნათქვამია სტატიაში.
