ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ საზოგადოებრივი რადიოს პირდაპირი ეთერის საშუალებით როგორც დევნილების, ისე ჟურნალისტის კითხვებს უპასუხა. დავით დარახველიძემ საუბარი იმ სიახლით დაიწყო, რომელზეც მთავრობის წევრებმა დღეს მთავრობის სხდომაზე იმსჯელეს. ეს არის ხელისუფლების დეცენტრალიზაციის თემა და რეფორმა თვითმართველობის მიმართულებით.
მინისტრმა ასევე ისაუბრა დევნილთა განსახლების საკითხებზე, დაგეგმილ მშენებლობებზე, კარკასული ობეიქტების მოძიებასა და რეაბილიტაციაზე. ასევე აღნიშნა, რომ ბაქოს ქუჩა #1-ში შეჭრილ დევნილებს, რომელთაც თვითნებურად დატოვებული ფართი საკუთარი სურვილით დატოვეს, სამინისტრო განსახლებას თებერვლის ბოლოსთვის დაპირდა, თუმცა, ეს პირობა ვადაზე ადრე შესრულდა და დევნილებს საცხოვრებელი ბინები გაუნაწილდათ კიდეც.
ერთ-ერთი მსმენელის კითხვა მიტოვებულ შენობებს ეხებოდა. კერძოდ, მსმენელი დაინტერესდა მუშაობს თუ არა სამინისტრო ასეთი შენობების გამოყენების მიმართულებით. მინისტრმა მას უპასუხა, რომ რეგიონალურ სამმართველოებს უკვე დაევალათ ასეთი ობიექტების მოძიება: „ეკონომიკის სამინისტროსთან შეთანხმების შემდეგ, ასეთი ობიექტები გადმოგვეცემა, მოხდება მისი რეაბილიტაცია, საცხოვრებლად გადაკეთება და გადაეცემათ დევნილებს."
დავით დარახველიძემ ერთ-ერთ მაგალითად თავადაცვის სამინისტრო დაასახელა,ვისთანაც შენობების გადმოცემაზე მოლაპარაკებები მიმდინარეიობს: „ სამინისტრო უკვე აწარმოებს მოლაპარაკებებს თავდაცვის სამინისტროსთან ვაზიანში გარკვეულ ობიექტებთან დაკავშირებით. მოლაპარაკების წარმატებით დასრულების შემთხვევაში სამინისტროს საშუალება ექნება 250 - ბინა გადასცეს დევნილებს. ასევე გვაქვს რამდენიმე ობიექტი თბილისსა და რეგიონებში."
მინისტრმა აღნიშნა, რომ ამ ეტაპზე რეგიონებში, მაგალითად თეთრიწყაროში, საცხოვრებელი ბინის საშუალება არის, ბინები გარემონტებულია და სურვილის შემთხვევაში დევნილებს დღესვე შეუძლიათ დაბინავდნენ. დავით დარახველიძის განმარტებით: „წინა ხელისუფლების პოლიტიკა არ ითვალისწინიბდა დევნილების თბილისში განსახლებას. ახალი მთავრობა დევნილთა განსახლებას განიხილავს როგორც რეგიონებში ასევე თბილისში. სურვილის შემთხვევაში, დევნილებს აქვთ შესაძლებლობა წავიდნენ რეგიონებში. ამ ეტაპზე, თბილისში ბინები არ გაგვაჩნია, თუმცა, აქტიურად ვმუშაობთ როგორც მშენებლობების, ასევე კარკასული ობეიქტების რეაბილიტაციის კუთხით."
გადაცემაში დაისვა კითხვა დევნილთა ფსიქოლოგიური დახმარების შესახებ. როგორც მინისტრმა განაცხადა, რომ სამინისტროში მზადდება რამდენიმე პროექტი დევნილთა ფსიქოლოგიური რეაბილიტაციისათვის. ამ პროექტებს ამზადებს მინისტრის მოადგილე ნინო ჭავჭავაძე, რომელიც არის ფსიქოლოგიის მეცნიერებათა დოქტორი.
სხვა საკითხებთან ერთად, გადაცემის დასასრულს მინისტრმა მოკლედ ისაუბრა დევნილთა მიღების დღეებზე, რომელიც დევნილ მოსახლეობასთან კომუნიკაციის და ინფორმაციის გაცვლის ერთ-ერთი საუკეთესო საშუალებაა.
