რადიო თავისუფლების მედიასკოლა დამოუკიდებელი მედიის განვითრების პროგრამაა, რომელიც დაარსდა ამერიკის საერთაშორისო განვითარების სააგენტო USAID -ის ხელშეწყობით, G-MEDIA პროგრამის ფარგლებში. G-MEDIA პროგრამა ოთხწლიანი პროექტია, 12.9 მილიონიანი ბიუჯეტით, რომელსაც IREX-ი ახორციელებს.

რადიო თავისუფლების მედიასკოლა სთავაზობს ერთწლიან სასერტიფიკატო პროგრამას და ორთვიან სტაჟირების პროგრამას - "ისწავლე და იმუშავე რადიო თავისუფლებასთან ერთად" მათ, ვინც დაინტერესებულია ჟურნალისტური კარიერით და პროფესიული პრაქტიკით.
ორივე პროგრამა სთავაზობს სტუდენტებს უახლესი მულტიმედიური ტექნოლოგიების უნარების ათვისებასა და პრაქტიკულ სამუშაოებს, ასევე შესაძლებლობას აიმაღლონ ჟურნალისტური უნარები პრაქტიკოსი პროფესიონალების დახმარებით. თეორიასა და პრაქტიკაზე დაფუძნებულ სალექციო კურსებს უძღვებიან "რადიო თავისუფალი ევროპა / რადიო თავისუფლების" მაღალკვალიფიციური და გამოცდილი ჟურნალისტები და მათი კოლეგები პრაღის სათავო ოფისიდან.

ერთწლიანი სასერტიფიკატო პროგრამის სწავლება მიმდინარეობს განათლების მულტიმედია ცენტრში (MEC), რომელიც 2012 წლის მარტში G-MEDIA პროგრამის ფარგლებში გაიხსნა. ცენტრი მედიაპროფესიონალებს სთავაზობს თანამედროვე მულტიმედიის ‘'ნიუსრუმს'' - ლექციების, მოკლევადიანი უფასო კურსების, ‘"ვორქშოფების'' და პროფესიული განვითარების ტრენინგპროგრამებისთვის.