,,სასაცილოა საუბარი, იმაზე თითქოს ვითხოვდი გარანტიებს ჩემი პირადი ხელშეუხებლობისთვის", -განაცხადა მიხეილ სააკაშვილმა საკონსტიტუციო ცვლილებებთან დაკავშირებით, საპარლამენტო უმრავლესობის განცხადებების კომენტირებისას და აღნიშნა, რომ მის ინტერესებშია ქვეყნის სტაბილურობა.
,,ჩემს ინტერესებში როგორც პრეზიდენტის არის ქვეყნის სტაბილურობა. ჩემს ინტერესებშია, რომ გასული წლის ოქტომბერში არჩეულ მთავრობას საშუალება ჰქონდეს იმუშაოს შეფერხების გარეშე, განახორცილოს ის პროგრამა, რომელსაც ქართველ ხალხს დაჰპირდა. ამის პარალელურად ქვეყანაში დემოკრატიული პროცესი გაგრძელდეს. გაძლიერდეს დემოკრატიული ინსტიტუტები, გაფართოვდეს და გაუმჯობესდეს პერსპექტივა თითოეული საქართველოს მოქალაქისთვის მომავალი დღისთვის", -განაცხადა მიხეილ სააკაშვილმა და აღნიშნა, რომ ამ მიმართულებით მათი საქართველოს მთავრობისთვის პრობლემები არ შეუქმნიათ.
,,დღეს ისინი ამბობენ, რომ საკონსტიტუციო ცვლილებებთან დაკავშირებით მოლაპარაკების პროცესში პრობლემები შევქმენით. მინდა ვთქვა, რომ პარლამენტის ყოფილი თავმჯდომარისა და ამჟამინდელი თავმჯდომარის ორი დავითის მოლაპარაკებები ძირითადად კონსტრუქციულად მიდიოდა. მე ვიყავი ამ მოლაპარაკების მონაწილე და მინდა დავადასტურო, რომ ჩვენი ძირითადი ხედვა ემთხვევოდა სწორედ იმ საკითხებზე, რომელზეც დასაწყისში ვისაუბრე და ჩვენ გვსურდა, რომ ეს ყველაფერი შეთანხმებამდე მისულიყო", -განაცხადა მიხეილ სააკაშვილმა და აღნიშნა, რომ სიმართლეს არ შეესაბამება ინფორმაცია, თითქოს მოლაპარაკების დროს ,,საპარლამენტო ოპოზიცია სხვა გარიგებებზე გასვლას ცდილობდა".
,,გაისმა მოსაზრება, თითქოს საქართველოს პრეზიდენტი, მე ვითხოვდი გარანტიებს ჩემი პირადი ხელშეუხებლობისთვის, ან მთავრობის ყოფილი წევრები, პარლამენტის წევრები ითხოვდნენ ასეთ გარანტიებს. მინდა ყველას შევახსენო, რომ 2008 წელს ვლადიმერ პუტინმა ყველას თვალწინ საჯაროდ, სასიკვდილო განაჩენი გამომიტანა, ის არ გაუქმებულა და როგორც წესი, ის ასეთ რაღაცეებზე უკან არ იხევს. ეს განაჩენი გამომიტანა იმიტომ, რომ ჩემი ქვეყანა დავიცვი. მე ჩემს მეგობრებთან, ქართველ ერთან ერთად გადავარჩინე საქართველო. თქვენ მართლა გგონიათ, რომ რუსეთმა ამხელა ამბავი იმიტომ ატეხა და თავის თავს ზიანი მიაყენა მხოლოდ იმის გამო, რომ იგივე ტერიტორია ეკონტროლებინა რასაც აქამდე აკონტროლებდა. მას საჯაროდ მომისაჯა სიკვდილი. ამის შემდეგ ლაპარაკი იმაზე, რომ მე მეშინია ვიღაც ადგილობრივი წვრილმანი შანტაჟისტების, როცა არ შემეშინდა ბევრად უფრო ძლიერი სუბიექტის მიერ გამოტანილი პირდაპირი სასიკვდილო განაჩენი უხერხულია და სასაცილოა", -განაცხადა მიხეილ სააკაშვილმა და აღნიშნა, რომ ,,სისულელეა საუბარი იმაზე, თითქოს ,,ნაციონალური მოძრაობა" ამნისტიას ითხოვს.
