დღეს, 20 თებერვალს, თბილისის საქალაქო სასამართლოში 12:00 საათზე სამსახურეობრივი უფლებამოსილების ბრალდებით დაკავებული შს ყოფილი მინისტრისა და თავდაცვის სამინისტროს ექს-მაღალჩინოსნების გიორგი კალანდაძის და ზურაბ შამათავას წინასასამართლო სხდომა გაიმართება.
ბაჩანა ახალაიას უფლებადამცველის განმარტებით პროცესზე საქმის არსებითი განხილვა არ მოხდება და საუბარი შეეხება საქმეში არსებული მტკიცებულებების დასაშვებლობის საკითხს.
შეგახსენებთ, რომ სამსახურეობრივი უფლებამოსილების საქმესთან დაკავშირებით პირველი სასამართლო პროცესი 25 დეკემბერს უნდა გამართულიყო, თუმცა პროკურატურის მოთხოვნით მოსმენის თარიღი ორჯერ შეიცვალა. ახალაიას ადვოკატების განმარტებით, პროკურატურას სასამართლო პროცესის დაწყების თარიღის გადავადება მოუმზადებლობისა და მტკიცებულებების არარსებობის გამო დასჭირდა.
მთავარ პროკურატურაში საქართველოს თავდაცვის სამინისტროს თანამშრომელთა მხრიდან უფლებამოსილების გადამეტების ფაქტზე გამოძიება გასული წლის ნოემბრის თვეში, ხელისუფლებაში განხორციელებული ცვლილებების შემდეგ დაიწყო. ზემოხსენებული დანაშაული გათვალისწინებულია საქართველოს სისხლის სამართლის კოდექსის 333-ე მუხლის მე-3 ნაწილის „გ" ქვეპუნქტით.
პროკურატურის მტკიცებით, გამოძიებით დადგენილია, რომ 2011 წლის ოქტომბერში თავდაცვის მინისტრმა ბაჩანა ახალაიამ, თავდაცვის სამინისტროს გაერთიანებული შტაბის უფროს გიორგი კალანდაძესთან და მე-4 ბრიგადის მეთაურ ზურაბ შამათავასთან ერთად, თავდაცვის მინისტრის სამუშაო კაბინეტში ფიზიკური და სიტყვიერი შეურაცხყოფა მიაყენა 6 სამხედრო მოსამსახურეს. ამასთან. ბაჩანა ახალაიამ ერთ-ერთ სამხედრო პირს - შოთა ბედოშვილს - დანის ტარი თავში ჩაარტყა.
აღნიშნულის შემდეგ ბაჩანა ახალაიამ ზემოაღნიშნული სამხედრო მოსამსახურეები ვაზიანში დისლოცირებულ მე-4 ბრიგადაში გადაიყვანა. აქ, ბრიფინგის ოთახში მათ კვლავ სცემეს და მიაყენეს სიტყვიერი შეურაცხყოფა. ამის შემდეგ დაზარალებულთა ფიზიკური და სიტყვიერი შეურაცხყოფა გაგრძელდა მე-4 ბრიგადის პირადი შემადგენლობის, დაახლოებით 20-30 კაცის წინაშე, ეზოში (ე.წ. „პლაცზე") მოწყობილი სამხედრო მოსამსახურეების თვალწინ.
გატარებული ღონისძიებების შედეგად დაკავებული იქნენ ბაჩანა ახალაია, ზურაბ შამათავა და გიორგი კალანდაძე საქართველოს სისხლის სამართლის კოდექსის 333-ე მუხლის მე-3 ნაწილის „გ" ქვეპუნქტით გათვალისწინებული დანაშაულის ბრალდებით. კალანდაძეს სასამართლომ აღკვეთის ღონისძიების სახით გირაოს გადახდა, ხოლო ახალაიას - წინასწარი პატიმრობა შეუფარდა.