ცნობილმა ამერიკელმა ქანთრი-შემსრულებლმა, მინდი მაკკრიდიმ, მეოთხე მცდელობის შედეგად, სიცოცხლე თვითმკვლელობით დაასრულა. 38 წლის მომღერლის ცხედარი მის სახლში, არკანზასის შტატის ქალაქ ჰიბერ-სპრინგში აღმოაჩინეს. „ფოქს ნიუსის" ინფორმაციით, ამერიკელი მომღერლის სუიციდის გადაწყვეტილება მისი ქმრის გარდაცვალებას უკავშირდება.
გამოძიების მონაცემებით, მომღერალმა თავდაპირველად თავისი ძაღლი მოკლა, შემდეგ კი თავის არეში პისტოლეტიდან ტყვია დაიხალა. მაკკრიდის ახლობლების განცხადებით, მიზეზი მისი მძიმე სულიერი მდგომარეობა იყო. ერთი თვით ადრე, მაკკრიდის ქმარმა, დევიდ უილსონმა, რომელიც მისი ერთ-ერთი შვილის მამა იყო, თავი მოიკლა.
ამას გარდა, უკანასკნელ ხანს, მომღერალს უსიამოვნებების მთელი სერია დაატყდა თავს. თებერვლის დასაწყისში, სასამართლოს გადაწყვეტილებით, მას ორ ვაჟზე დედობის უფლება ჩამოართვეს. მიზეზი მომღერლის ალკოჰოლზე დამოკიდებულება გახდა.
მომღერალმა კარიერა 1995 წელს დაიწყო. 2010 წლამდე მინდის აქტივში ხუთი მუსიკალური ალბომი იყო.
