"ერთიანი ნაციონალური მოძრაობის" წევრი, დეპუტატი გიორგი გაბაშვილი პოლიციის აკადემიის პრორექტორის ლუკა კურტანიძის თანამდებობიდან გათავისუფლებას ითხოვს. როგორც ,,ნაციონალური მოძრაობის' ,,ფეისბუკის" გვერდზე გავრცელებულ გიორგი გაბაშვილის მიმართვაშია აღნიშნული იგი გმობს კურტანიძის მიერ საგაზეთო ინტერვიუში გაკეთებულ განცხადებას "ნაციონალური მოძრაობის" წევრების და პრეზიდენტის ფიზიკური განადგურების შესახებ.
გაბაშვილი შინაგან საქმეთა მინისტრს კურტანიძის გათავისუფლებისთვის 3 დღის ვადას აძლევს.
,,თუ ეს ადამიანი სამი დღის განმავლობაში გათავისუფლებული არ იქნება დაკავებული თანამდებობიდან და შსს სისტემას არ დატოვებს, ოპოზიცია ამას აღიქვამს, როგორც შსს და პირადად მინისტრის ირაკლი ღარიბაშვილის პოზიციად. შესაბამისად ზღაპარი რომელსაც პოლიციის დეპოლიტიზაციაზე გვიყვებოდნენ დასრულებულია, მაგრამ საბოლოო წერტილი სამ დღეში დაესმება, თუ ლუკა კურტანიძე გათავისუფლებული არ იქნება", -განაცხადა გაბაშვილმა.
შეგახსენებთ, რომ გაზეთი "ასავალ-დასავალი" დღეს აქვეყნებს ინტერვიუს, სადაც შინაგან საქმეთა სამინისტროს პრორექტორი ლუკა კურტანიძე რვა თებერვალს ეროვნულ ბიბლიოთეკასთან მომხდარ ინციდენტს აფასებს.
კურტანიძე "ნაციონალური მოძრაობის" წევრებს ვირთხებს უწოდებს და იმუქრება, რომ პირადად გააკონტროლებს, რომ ინციდენტში მონაწილე "ნაციონალური პარტიის" წევრებმა პასუხი აგონ. კურტანიძე პრეზიდენტსაც ემუქრება და მას კადაფის დასასრულს უწინასწარმეტყველებს.
"საზოგადოების რისხვას მხოლოდ ის შეაკავებს, თუ თითოეული დამნაშავე უმკაცრესად აგებს პასუხს. პირადად მე, ყველაფერს გავაკეთებ იმისთვის, რომ კედელაშვილმა პასუხი აგოს. ჩიორა თაქთაქიშვილი არის პროვოკატორი.
სწორედ ჩიორა თაქთაქიშვილისნაირი ვირთხების რიტორიკას გამოჰყავს წყობილებიდან გამწარებული ხალხი. ეს ხალხი ჩვენ გვეკითხება, როდემდე უნდა ვითმინოთ ეს ნაძირლებიო.
ვაფრთხილებ ნაძირალა სააკაშვილს და მის ყველა ვირთხას - ნუ თამაშობთ გამწარებული ქართველი ხალხის ნერვებზე, თორემ დაამთავრებთ ისე, როგორც კადაფიმ დაამთავრა",- აცხადებს კურტანიძე.
