11 თებერვალს სასჯელაღსრულების, პრობაციისა და იურიდიული დახმარების საკითხთა მინისტრი, სოზარ სუბარი,სამინისტროს წარმომადგენლები და სახალხო დამცველი უჩა ნანუაშვილი სასტუმროში „თბილისი მარიოტი" შეხვდნენ ადგილობრივი და საერთაშორისო ორგანიზაციების წარმომადგენლებს.
საუბარი შეეხო სასჯელაღსრულების დაწესებულებების მონიტორინგის მექანიზმებს. შეხვედრის შედეგად გადაწყდა, რომ დაწესებულების მონიტორები სახალხო დამცველის აპარატის, კერძოდ პრევენციის ეროვნული დეპარტამენტის დაქვემდებარებაში იქნებიან. მასში გაერთიანდებიან სხვადასხვა პროფესიის მქონე პირები, კერძოდ, სასჯელაღსრულების სფეროში მონიტორინგის გამოცდილების მქონე იურისტები, რომლებიც არ ეწევიან კერძო საადვოკატო პრაქტიკას (10 ექსპერტი), საერთო პროფილის მქონე ექიმები, რომლებსაც გააჩნიათ წამების, არასათანადო მოპყრობის კვალის იდენთიფიცირების გამოცდილება (3 ექიმი), ფსიქიატრები (2 ექსპერტი), ფსიქოლოგები (2 ექსპერტი), სოციალური მუშაკები (1 ექსპერტი), არასრულწლოვანთა მართლმსაჯულების სფეროში გამოცდილების მქონე ექსპერტი, სამხედრო ჰაუპტვახტებისა და ნაწილების მონიტორინგის ექსპერტი, გენდერის საკითხებზე მომუშავე ექსპერტი და შესაბამისის კვალიფიკაციისა და გამოცდილების მქონე ექსპერტები რეგიონებიდან.
აღნიშნული პირები, სახალხო დამცველის ეროვნული პრევენციის დეპარტამენტის თანამშრომლებთან ერთად მუდმივად მიიღებენ მონაწილეობას მონიტორინგის მიზნით განხორციელებულ გეგმიურ და საჭიროებიდან გამომდინარე, არაგეგმიურ ვიზიტებში.
მონიტორინგის შედეგების შესახებ საზოგადოებას მიეწოდება ინფორმაცია ყოველკვარტალური ბიულეტენების საშუალებით.
