11 თებერვალს საქართველოში, ისევე, როგორც ევროპაში 112-ის დღე აღინიშნება. ამ დღესთან დაკავშირებით 112-ის ოფისში 11:00 საათზე სპეციალური ღონისძიება გაიმართება, რომელსაც შინაგან საქმეთა მინისტრი ირაკლი ღარიბაშვილი და 112-ის ხელმძღვანელი, გიორგი ბიჭიაშვილი დაესწრებიან. ღონისძიებაზე ასევე მოწვეულნი არიან მზრუნველობამოკლებული ბავშვები, რომელთაც 112-ის სახელით სამსახსოვრო საჩუქრები გადაეცემათ.
112-ზე დარეკვა საქართველოში მოქმედი ყველა ფიქსირებული და მობილური სატელეფონო ქსელიდან შეიძლება. ზარის განხორციელება უფასოა და დარეკვა მობილური ტელეფონის ორმხრივად გათიშვისა, თუ სიმბარათის არ არსებობის შემთხვევაშიც შესაძლებელია.
112 დედაქალაქის მასშტაბით ასევე უზრუნველყოფს: საგზაო უსაფრთხოების ეფექტურ მართვას, გზაჯვარედინებზე დამონტაჟებული შუქნიშნების მონიტორინგის გზით, რაც ხელს უწყობს შეუფერხებელ მოძრაობასა და შუქნიშნის წითელ სიგნალზე ლოდინის ხანგრძლივობის შემცირებას.
112-ის ცენტრი, ერთი წელია ფუნქციონირებს, მის ძირითად ფუნქციას საგანგებო სიტუაციებისა და გადაუდებელი დახმარების აუცილებლობის შესახებ ინფორმაციის მიღება, დამუშავება და მათზე რეაგირება წარმოადგენს. 112-ზე დარეკვით მოქალაქეები სახანძრო-სამაშველო, სასწრაფო-სამედიცინო და საპატრულო პოლიციას შეუფერხებლად უკავშირდებიან. ერთიანი ქოლცენტრისა და ცენტრალიზებული სისტემის მიზანია, გადაუდებელი დახმარების სამსახურებთან მოქალაქეებს მარტივი და ხელმისაწვდომი კავშირი შესთავაზოს.
2009 წლის თებერვალში ევროკომისიამ, ევროპარლამენტმა და ევროსაბჭომ გამოაცხადეს 11 თებერვალი 112-ის დღედ. ეს თარიღი აღინიშნება ყოველწლიურად და მიზნად ისახავს 112-ის ცნობადობის გაზრდას. მნიშვნელოვანია, რომ ეს ნომერი ცნობადი იყოს ყველა ადამიანისათვის. ევროკავშირი აქტიურად მუშაობს 112-ის ცნობადობის გაზრდაზე.
მასალის გამოყენების პირობები
