საქართველოს დავით აღმაშენებლის ჩოხოსანთა კავშირი "ჩოხოსნები - 1973" დიდი მეფის ხსენების დღეს 1973 წლიდან აღნიშნავს.
8 თებერვალსაც შეჯამდა კავშირის გასული წლის საქმიანობის შედეგები, გაიმართა დავით აღმაშენებლის ხსენებისადმი მიძღვნილი პარაკლისი, ასევე კავშირის წევრებმა დავით აღმაშენებლის ძეგლთან მიიტანეს ყვავილები. სახელოვანი წინაპრის დაბადებიდან 940-ე წლისთავს ჩოხოსნები ტრადიციისამებრ მეუღლეებთან და შვილებთან ერთად აღნიშნავენ.
დღეს ჩოხოსნობის ინსტიტუტი გულისხმობს ქართველი ერის ზნეობრივი, ისტორიული და კულტურული ფასეულობების დაცვის, განვითარებისა და პოპულარიზაციისთვის საქმიანობას. თუმცა საბჭოთა პერიოდში უფრო პროტესტის ხასიათს ატარებდა. მაგალითად, 1921 წელს საბჭოთა რუსეთის მიერ საქართველოს დემოკრატიული რესპუბლიკის ოკუპაციისადი პროტესტის ნიშნად კონსტანტინე გამსახურდიამ, ვახტანგ კოტეტიშვილმა, პავლე ინგოროყვამ და ალექსანდრე აბაშელმა შავი ჩოხა-ახალუხი ჩაიცვა გლოვის ნიშნად. ასევე, საბჭოთა რეჟიმისადმი პროტესტმა განაპირობა 1973 წელს დავით აღმაშენებლის ჩოხოსანთა კავშირის ჩამოყალიბება. ოთხი ახალგაზრდა ჰენრი კუპრაშვილი, გიორგი ცხოვრებაძე, ზურაბ გველესიანი და თამაზ შეროზია 1973 წელს ჩოხებჩაცმულნი შეეგებნენ დავით აღმაშენებლის, აფხაზთა და ქართველთა უდიდესი მეფის დაბადებიდან 900 წლისთავს და, ეს ტრადიცია 40 წელია გრძელდება.