მკვლევერებმა აღმოაჩინეს პლანეტები, სადაც სიცოცხლისთვის აუცილებელი პირობებია. უახლოესი მსგავსი პლანეტა 13 სინათლის წლის მანძილზეა ჩვენგან. მისი გამოკვლევა ჟურნალ Astrophysical Journal-ში გამოქვეყნდება. კვლევის ერთ-ერთი ავტორის, ჰარვარდის უნივერსისტეტის მეცნიერის, დევიდ შარბონოს განმარტებით, ამის შემდეგ სიცოცხლის ძიება მზის სისტემაში გაცილებით ადვილი იქნება, ვიდრე ეს წარმოგვედგინა.
უკანასკნელ ხანს, ეგზოპლანეტებზე ნადირობამ არნახულს მასშტაბს მიაღწია. „ნასას" კატალოგში 800-ზე მეტი ეგზოპლანეტა მოხვდა. კვლევის შედეგების მიხედვით გაირკვა, რომ ყოველი ვარსკვლავის ირგვლივ, საშუალოდ, 1,6 პლანეტაა. გაირკვა, რომ დედამიწას შეიძლება მილიარდობით ორეული ჰყავდეს, ჯერ მხოლოდ ჩვენს გალაქტიკაში.
ისეთი პლანეტები, რომელთა ზომაც დედამიწის ზომას ემთხვევა, ბევრია. ბოლო გამოკვლევებმა გვაჩვენა, რომ ყოველ მეექვსე ვარსკვლავს ახლავს ასეთი ზომის პლანეტა, რომელიც მის ორბიტასთან საკმაოდ ახლოა. ეს კი იმას ნიშნავს, რომ ჯერ მხოლოდ ჩვენს გალაქტიკაში 17 მილიარდი ასეთი პლანეტა არსებობს.
ვარსკვლავის ორბიტასთან ახლოს მყოფი პლანეტა ნიშნავს იმას, რომ ასეთ პლანეტებზე ძალიან მაღალი ტემპერატურაა. პლანეტა არც ძალიან შორს უნდა იყოს ვარსკვლავისაგან, რომ არ გაიყინოს. რომელი პლანეტაც ამ „მოთხოვნებს" აკმაყოფილებს, იქ, შესაძლოა, სიცოცხლისთვის აუცილებელი პირობები იყოს.