ანალიტიკური ორგანიზაცია „ჯეოქეისის“ თავმჯდომარემ ვიქტორ ყიფიანმა ახალი პოლიტიკური პარტია „ჯერ საქართველო” დააფუძნა.
პარტიის დამფუძნებელმა ყრილობამ პარტიის თავმჯდომარედ ვიქტორ ყიფიანი აირჩია.
„ეს დღე მოიტანა იმ პროცესებმა, რომელიც ქვეყანაში ვითარდება. ამ დღემ დაბადა და წარმოშვა საჭიროება ცვლილებებისა და სწორედ ის ფორმალური აქტი , რასაც დღეს ადგილი ექნება ამ მოლოდინებისადმი გადადგმული ნაბიჯია. ჩვენ არ გვაქვს პრეტენზია ვიყოთ მხოლოდ ოპოზიციური პარტია, ჩვენ გვინდა ვიყოთ ცვლილებებზე ორიენტირებული პოლიტიკური პარტია.
დღეს არის პოლიტიკური პარტია "ჯერ საქართველოს" დამფუძნებელი ყრილობა, მაგრამ ყოველგვარი პირფერობის გარეშე მინდა ვთქვა - ეს არ არის ჩვენ მიერ მიღებული გადაწყვეტილება, ეს გადაწყვეტილება მიიღო დრომ და იმ მოლოდინებმა, რაც ქვეყანაში შეიქმნა, ამიტომ, ჩვენი მხრიდან მხოლოდ ფორმალური პასუხი არის ამ მოლოდინებთან დაკავშირებით. დღევანდელი დღე დიდი მოგზაურობის დასაწყისია. იმედია, ეს მოგზაურობა ამ მოლოდინების საპასუხო იქნება. რაც შეეხება სხვა პარტიებთან ურთიერთობას, ღია ვართ ყველასთან საურთიერთოდ. გვაქვს ჩვენი განსაკუთრებული დამოკიდებულება ალიანსთან მიმართებით. ვფიქრობთ, რომ „ჯერ საქართველოს" აქვს იმის ბუნებრივი რესურსი, რომ განვითარდეს ალიანსს მიღმა, თუმცა ეს არ გამორიცხავს პირად კომუნიკაციებს, ინდივიდუალურ კონტაქტებს. ასეთი კონტაქტები იყო, არის და დარჩება ჩვენს ხელწერად",- განაცხადა ვიქტორ ყიფიანმა.
პოლიტსაბჭოს წევრები არიან: ვახტანგ კაპანაძე; ვალერი ჩეჩელაშვილი; რუსუდან თევზაძე; ნიკოლოზ ხატიაშვილი; გიორგი ანთაძე.
პარტიის თანადამფუძნებლები და მრჩევლები არიან ნიკოლოზ ალავიძე და გიორგი ტუმასიანი.
სარევიზიო კომისიის თავმჯდომარეა გიორგი შალამბერიძე, ხოლო წევრები ბექა ბოჭორიშვილი; ივერი მისრიაშვილი და ვასილ ივანოვ-ჩიქოვანი.
პარტიის აღმასრულებელი მდივნი ზურა შარაშენიძე იქნება.
