ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ და მინისტრის მოადგილეებმა გოგი ფაცაციამ და ნინო ჭავჭავაძემ, შვედეთის საეთაშორისო განვითარების სააგენტოს (SIDA) ხელმძღვანელთან საქართველოში ევა სმედბერგთან და დანიის ლტოლვილთა საბჭოს (DRC) სამხრეთ კავკასიის რეგიონის კოორდინატორთან პოლ მაკენტოშთან, სამუშაო შეხვედრა გამართეს.
მინისტრმა სტუმრებს დევნილთა ამჟამინდელი პრობლემატიკა გააცნო და აღნიშნა, რომ მათ ძირითად საჭიროებას საცხოვრებელი ფართი წარმოადგენს. შესაბამისად, დავით დარახველიძის თქმით, სასურველია, დევნილი მოსახლეობის დახმარება სწორედ საბინაო პრობლემების მოგვარებისკენ იყოს მიმართული. მინისტრის თქმით, სამინისტრო აქტიურად მუშაობს დევნილებისთვის საცხოვრებელი ობიექტების მოძიებაზე, თანამშრომლობს ეკონომიკის სამინისტროსთან სხვადასხვა ობიექტების გადმოცემის და შემდგომ მათი რეაბილიტაციის კუთხით.
შვედეთის საეთაშორისო განვითარების სააგენტოს ხელმძღვანელმა საქართველოში, ევა სმედბერგმა თანამშრომლობის სურვილი გამოხატა და გაიზიარა მინისტრის მოსაზრებები. „ჩვენ ვითანამშრომლებთ სამინისტროსთან რათა მოხდეს დევნილთა ბრობლემების უკეთ გადაწყვეტა" - აღნიშნა მან.
პოლ მაკენტოშმა დანიის ლტოლვილთა საბჭოს საქმიანობაზე ისაუბრა. მოკლედ წარადგინა ის საკითხები, რომლებიც მათ ბოლო წლების განმავლობაში განახორციელეს შვედეთის საეთაშორისო განვითარების სააგენტოსთან ერთად. ამ პროექტის ძირითადი საკითხები მოიცავდა: დევნილთა ელემენტარული თავშესაფრით უზრუნველყოფას, თემის მობილიზაციას, შემოსავლის ზრდის პროგრამებს და სხვ. ასევე, ისაუბრა ახალ პროექტზე, რომელიც 32 თვის განმავლობაში გაგრძელდება და მისი ბიუჯეტი 30 000 000 შვედურ კრონა შეადგენს.
შვედეთის საეთაშორისო განვითარების სააგენტო (SIDA) და დანიის ლტოლვილთა საბჭო (DRC) საქართველოს ერთ-ერთი მნიშვნელოვანი პარტნიორები არიან. ისინი ბევრ სასიკეთო საქმეს აკეთებენ, როგორც იძულებით გადაადგილებულ პირთათვის, ასევე მთლიანად ქვეყნისთვის.
