დევნილებს, დღეს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძე შეხვდა, ახალმოსახლეობა მიულოცა და ბინის გასაღები გადასცა.
როგორც დავით დარახველიძემ აღნიშნა, აღნიშნული ფართი დევნილებს საკუთრებაში გადაეცემათ და განსახლების პროცესი გაგრძელდება.
დავით დარახველიძე: „ვაგრძელებთ დევნილი მოსახლეობის საცხოვრებელი ფართით დაკმაყოფილების პროცესს. დღეს საბინაო პრობლემა 36 ოჯახს მოუგვარდა. ისინი რეაბილიტირებულ ფართში შესახლდნენ. ეს ფართი მათი საკუთრება იქნება. ყველას მადლობას ვუხდი, ვინც აღნიშნულ საქმიანობაში წვლილი შეიტანა."
მინისტრმა ისიც აღნიშნა, რომ რეაბილიტაციის პროცესი გრძელდება და ეტაპობრივად კრიტერიუმების მიხედვით ის დევნილებიც დაკმაყოფილდებიან, რომელთაც საბინაო პრობლემა ჯერაც მოგვარებული არ აქვთ.
როგორც ერთ-ერთმა დევნილმა მერი კობერიძემ აღნიშნა, საკუთარ ჭერს უიმედოდ ელოდა და ბედნიერია, რომ ფართი მიიღო: „ვცხოვრობდით „ფოლადში". ძალიან გაჭირვებაში ვიყავი. გვაწვიმდა, იატაკიდან მატლები, ჭიები ამოდიოდნენ. ეხლა გახარებულები ვართ. გვეღირსა ჭერი და კმაყოფილები ვართ."

ახალ ბინებში ის დევნილები შესახლდნენ, რომლებიც ავარიულ შენონებში გაუსაძლის პირობებში ცხოვრობდნენ. საცხოვრებელი ფართით დაკმაყოფილებას ამ ეტაპისთვის კიდევ 65 000-მდე დევნილი ოჯახი ელოდება.