აფხაზ სეპარატისტთა ლიდერმა ალექსანდრე ანქვაბმა ბედიის, მოქვისა და ილორის ტაძრების რეკოსტრუქციის განკარგულება გასცა. აღნიშნული განცხადება ანქვაბმა სოხუმში ჩატარებულ თათბირზე გააკეთა, რომელზეც ოკუპირებულ ტერიტორიაზე არსებული კულტურული მემკვიდრეობის ძეგლების მდგომარეობაზე იმსჯელეს.
როგორც ჩანს, ქართული ხუროთმოძღვრების ისტორიული ნიმუშების მდგომარეობა ამჟამად იმდენად მძიმეა, რომ სეპარატისტები ამ საკითხზე უახლოეს მომავალში უშიშროების საბჭოს სხდომის მოწვევასაც გეგმავენ. აფხაზეთის ე.წ. უშიშროების საბჭოს მდივანი სტანისლავ ლაკობა აცხადებს, რომ უშიშროების საბჭოს სხდომა ამგვარ საკითხს პირველად მიეძღვნება.
აფხაზური მედიის ინფორმაციით, ანქვაბმა თათბირზე აღნიშნა, რომ "დღეს სახელმწიფოს ყველანაირი საშუალება გააჩნია იმისათვის, რომ აფხაზეთის ტერიტორიაზე არსებული ისტორიული ძეგლების რეკონსტრუქციასა და აღდგენაზე მასშტაბურად იზრუნოს".
"ალექსანდრე ანქვაბმა მიმართა მეცნიერებს და მათ ბედიის, მოქვისა და ილორის ტაძრების რეკონსტრუქციის წინადადებების შემუშავება დაავალა. მან ასევე ლიხნის ტაძრის გადახურვის შესახებ დასკვნის გაკეთება მოითხოვა", _ იუწყება აფხაზური მხარე.
"ჩვენ არ უნდა დავუშვათ, რომ უძველესო ობიექტები ქვების გროვად იქცეს და ახალგაზრდა თაობამ არაფერი იცოდეს ჩვენი მდიდარი ისტორიის შესახებ", - განაცხადა ანქვაბმა თათბირზე.
