ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ აშშ-ის საელჩოს რეგიონალური განვითარების კოორდინატორთან ლტოლვილთა საკითხებში ჯოშუა ფიშელთან სამუშაო შეხვედრა გამართა. მხარეებმა დევნილთა განსახლების საკითხები განიხილეს.
შეხვედრის ძირითადი თემა დევნილთა საცხოვრებელი ფართით დაკმაყოფილება იყო. მინისტრმა მოკლედ ისაუბრა დევნილი მოსახლეობის ძირითად საჭიროებებზე, აღნიშნა, რომ 65 000 დევნილი ოჯახი ჯერ კიდევ განსახლების მოლოდინშია და სურვილი გათქვა, მოსახლეობის, ლტოლვილთა და მიგრაცის ბიურომ შესაძლებლობის ფარგლებში, რესურსი შენობების მშენებლობა-რეაბილიტაციისკენ მიმართოს. მინისტრმა ასევე აღნიშნა, რომ სამინისტროს გაორმაგებული ბიუჯეტიდან 30 მილიონი ლარი ამავე პრობლემების მოსაგვარებლად დაიხარჯება.
როგორც დავით დარახველიძემ აღნიშნა: „იმედი მაქვს, საერთაშორისო და დონორი ორგანიზაციები განაგრძობენ სამინისტროსთან თანამშრომლობას, რათა 4 წლიანი გეგმა - დევნილთა საცხოვრებელი სახლებით დაკმაყოფილების შესახებ, წარმატებით შესრულდეს."
აშშ-ის საელჩოს რეგიონალური განვითარების კოორდინატორთან ლტოლვილთა საკითხებში ჯოშუა ფიშელმა სამინისტროს და მინისტრის მუშაობა დადებითად შეაფასა და თანამშრომლობის სურვილი გამოთქვა. ასევე, მადლობა გადაუხადა მინისტრს დევნილების საკითხების მოგვარებაში წვლილის შეტანისთვის.