რვა ამერიკელი სენატორისგან შემდგარმა ჯგუფმა წარმოადგინა გეგმა, რომელიც ამერიკის შეერთებული შტატების საიმიგრაციო სასტემაში კარდინალურ რეფორმებს ითვალიწინებს. გეგმის მიხედვით, 11 მილიონი არარეგისტრირებული იმიგრანტი, რომელიც აშშ-ში ცხოვრობს, შეძლებს მიიღოს მოქალაქეობა, თუ ამავდროულად სასაზღვრო კონტროლი იქნება გაძლიერებული.
სენატორები ამ წინადადებით გამოვიდნენ ერთი დღით ადრე მანამდე, ვიდრე პრეზიდენტი ბარაკ ობამა რეფორმების საკუთარ გეგმას წარმოადგენს. დამკვირვებელთა განცხადებით, კონსერვატორების მკვეთრმა პოზიციამ ამ საკითხთან მიმართებაში, მნიშვნელოვნად შეამცირა არჩევნებში რესპუბლიკელების შანსი.
დემოკრატმა სენატორმა ნიუ-იორკის შტატიდან, ჩარლზ შუმერმა პრესკონფერენციაზე იმედი გამოთქვა, რომ კანონპროექტი, რომელიც პარტიათაშორისი ჯგუფის მიერ არის მომზადებული, სენატის მიერ მხარდაჭერილი გაზაფხულის დასასრულს ან ზაფხულის დასაწყისში იქნება.
ამ თემაზე განცხადება ჯონ მაკკეინმაც გააკეთა.
„ვფიქრობ, ყველა შეთანხმდება, რომ ჩვენი ქვეყნის ინტერესებში არ არის, რომ ეს ადამიანები იმალებოდნენ. მოდით, შევქმნათ სისტემა, რომელიც მათ ნებას დართავს, გამოვიდნენ ჩრდილიდან და შეასრულონ აუცილებელი მოთხოვნები, რასაც ამ ქვეყნის კანონმორჩილი მოქალაქეები ასრულებენ," - განაცხადა მაკკეინმა.
როგორც ვარაუდობენ, პრეზიდენტი საიმიგრაციო რეფორმების იმ ვერსიას წარმოადგენს, რომელიც ამ ჯგუფის პროექტიდან გამომდინარეობს. სხვა მცდელობები ამერიკის შეერთებული შტატების საიმიგრაციო სისტემის გადახედვისა, უკვე იყო 2006 და 2007 წლებში.
