საგარეო საქმეთა სამინისტროში, საგარეო საქმეთა მინისტრმა მაია ფანჯიკიძემ გაცნობითი ხასიათის შეხვედრა გამართა საქართველოში დიდი ბრიტანეთისა და ჩრდილოეთ ირლანდიის გაერთიანებული სამეფოს ახლადდანიშნულ საქმეთა დროებით რწმუნებულთან დევიდ ჯონ მორანთან.
შეხვედრის დასაწყისში საგარეო საქმეთა მინისტრმა დევიდ ჯონ მორანს მიულოცა საქართველოში ჩამობრძანება, გაერთიანებული სამეფოს საქმეთა დროებით რწმუნებულად დანიშვნა და წარმატებები უსურვა მომავალ საქმიანობაში.
შეხვედრაზე მხარეებმა განიხილეს საქართველოსა და გაერთიანებულ სამეფოს შორის არსებული ორმხრივი და მრავალმხრივი ურთიერთობების მნიშვნელოვანი საკითხები და თანამშრომლობის პერსპექტივები. საუბარი შეეხო საქართველოში მიმდინარე პროცესებს, ახალი მთავრობის საგარეო პოლიტიკის პრიორიტეტებს, საქართველოს ევროკავშირთან და ნატო-სთან ურთიერთობებსა და თანამშრომლობის განვითარების პერსპექტივებს.
შეხვედრის დასასრულს, საქართველოში გაერთიანებული სამეფოს საქმეთა დროებით რწმუნებულმა საქართველოს საგარეო საქმეთა მინისტრს ბრიტანული მხრიდან მჭიდრო თანამშრომლობა აღუთქვა და გამოხატა მზადყოფნა, ხელი შეუწყოს ორ ქვეყანას შორის ორმხრივი ურთიერთობების შემდგომ გაღრმავებას.
