ეკონომიკისა და მდგრადი განვითარების სამინისტროს ინფორმაციით, სამთავრობო ჯგუფი სასოფლო-სამეურნეო მიწების პრივატიზების ახალ კრიტერიუმებსა და პრინციპებზე მუშაობს და ამ პროცესს უახლოესი რამდენიმე კვირის განმავლობაში დაასრულებს.
"ამის შემდეგ საზოგადოებას გავაცნობთ იმ საკანონმდებლო ცვლილებების პროექტს, რომლის საშუალებითაც მომავალში ეს მტკივნეული საკითხი დარეგულირდება. ამ ეტაპზე სასოფლო-სამეურნეო მიწების პრივატიზების პროცესი დროებით შეჩერებულია.
უნდა შეიქმნას ერთიანი მიწის კოდექსი, რომელიც გააერთიანებს და დახვეწავს დღეს მოქმედი საკანონმდებლო ბაზის ცალკეულ კომპონენტებს. Aასევე მნიშვნელოვანია, სახელმწიფოს ჰქონდეს მონაცემთა დაზუსტებული ბაზები, რომელთაც მომავალში დავეყრდნობით"- ნათქვამია სამინისტროს მიერ გავრცელებულ განცხადებაში.
ეკონომიკისა და მდგრადი განვითარების სამინისტროში განმარტავენ, ერთიანი მიწის კოდექსი ის საკანონმდებლო ფორმატია, რომელშიც შევძლებთ ყველა ამ ასპექტის ასახვას და საქართველოს მოქალაქეების ინტერესების გათვალისწინებას.