ფინანსთა მინისტრის ნოდარ ხადურის ხელმძღვანელობით, ფინანსთა სამინისტროში გაიმართა სამინისტროს სათათბირო საბჭოს გაფართოებული სხდომა, სადაც მინისტრმა საბჭოს წევრებს რამდენიმე საკადრო გადაწყვეტილება გააცნო.
ფინანსთა მინისტრის პირველ მოადგილედ ოფიციალურად დაინიშნა გიორგი თაბუაშვილი, რომელიც მანამდე პირველი მოადგილის მოვალეობას ასრულებდა. ახალი ხელმძღვანელები ჰყავთ შემოსავლებისა და სახაზინო სამსახურებს.
ფინანსთა მინისტრის წარდგინებით და პრემიერ-მინისტრის ბრძანებებით შემოსავლების სამსახურის უფროსად ლაშა ხუციშვილი, ხოლო სახაზინო სამსახურის უფროსად ცოტნე ყავლაშვილი დაინიშნენ. ახალ თანამდებობაზე წარდგენამდე ლაშა ხუციშვილი მუშაობდა კომპანია Ernst& Young-ის (ერნსტ ენდ იანგი) თბილისის ოფისში, ცოტე ყავლაშვილი ხელმძღვანელობდა ფინანსთა სამინისტროს ფისკალური პროგნოზირების დეპარტამენტს.
გარდა ამისა, სათათბირო საბჭოს სხდომაზე იმსჯელეს ფინანსთა სამინისტროს 2013 წლის განმავლობაში დაგეგმილ რეფორმებზე, მინისტრის მოადგილეებმა, სამსახურებისა და დეპარტამენტების ხელმძღვანელებმა წარადგინეს მიმდინარე წლის სამოქმედო გეგმა. ფინანსთა მინისტრმა საბჭოს წევრებს დაავალა გაგრძელდეს ინტენსიური მუშაობა ფინანსთა სამინისტროს გრძელვადიანი განვითარების სტრატეგიაზე, რათა ჩამოყალიბდეს სერიოზული ხედვა ქვეყნის ეკონომიკისა და საბიუჯეტო პროცესის განვითარების შესახებ.