„ფინანსთა სამინისტროს თანამდებობის პირებზე 2012 წლის იანვარ-დეკემბრის პერიოდში დარიცხული პრემიების ოდენობის შესახებ საჯარო ინფორმაციის მოთხოვნით, გასული წლის 12 დეკემბერს სამინისტროს მომართა ინფორმაციის თავისუფლების განვითარების ინსტიტუტმა (IDFI)

აღსანიშნავია, რომ გასულ წლებში ამ ტიპის საჯარო ინფორმაციას კანონის მოთხოვნის მიუხედავად, ფინანსთა სამინისტროს წინა ხელმძღვანელობა არ გასცემდა, რის გამოც, სასამართლო დავა ჰქონდა რამდენიმე არასამთავრობო ორგანიზაციასთან. ფინანსთა სამინისტროში ახალი გუნდის მოსვლის შემდეგ, სამინისტროს საქმიანობის გამჭვირვალობის უზრუნველსაყოფად, წინა წლების პრაქტიკისგან განსხვავებით, აღნიშნული ინფორმაცია ვადების სრული დაცვით გაიცა და მასთან ერთად, სრულყოფილი პასუხები გაეცა IDFI-ის სხვა შეკითხვებსაც, რომლებიც 2012 წელს ფინანსთა სამინისტროს გაწეულ საქმიანობას ეხებოდა.

(ამ კუთხით ფინანსთა სამინისტროს გასული წლების პრაქტიკა აღწერილია თავად თავისუფლების განვითარების ინსტიტუტის ბოლო ანგარიშში - opendatablog.wordpress.com/)

რაც შეეხება ნოემბერ-დეკემბერში ფინანსთა სამინისტროს თანამდებობის პირებზე და თანამშრომლებზე დარიცხული თანხების ოდენობას. 2012 წლის ბოლოს ფინანსთა სამინისტროს ყველა თანამშრომელს თითქმის 24 საათის განმავლობაში მოუწია მუშაობა, რათა ცალკეული ჯგუფების ფუფუნებისთვის განკუთვნილი ბიუჯეტის ნაცვლად, მოსახლეობისთვის წარედგინათ ხალხზე ორიენტირებული ბიუჯეტი, რაც შეიძლება სწრაფად მოემზადებინათ ცვლილებების პაკეტი საგადასახადო კოდექსში და მნიშვნელოვანი საგადასახადო შეღავათი გადამხდელებს 1 იანვრიდანვე ეგრძნოთ"- ნათქვამია ფინანსთა სამინისტროს განცხადებაში.

ნოდარ ხადურის უწყებაში ამბობენ, რომ სწორედ აღნიშნული სამუშაოს კვალიფიციურად შესრულებისთვის სამინისტროს ბიუჯეტში გამოიძებნა სახსრები და წინასაახალწლოდ, ფინანსთა სამინისტროს ყველა თანამშრომელმა მიიღო ხელფასი და ხელფასზე დანამატი.

„ასევე უნდა აღინიშნოს, რომ სწორედ ადმინისტრაციული ხარჯების შეკვეცის მიზნით, ფინანსთა სამინისტრომ 2013 წლის ბიუჯეტში თავად შეიმცირა საბიუჯეტო ასიგნება 18 მილიონი ლარით.

რაც შეეხება სამინისტროს მუშაობის ტრანსპარენტულობას, ფინანსთა სამინისტრო მომავალშიც მზად არის ყველა საჯარო ინფორმაცია ხელმისაწვდომი გახადოს ნებისმიერი დაინტერესებული პირისთვის"- აცხადებენ ფინანსთა სამინისტროში.