სოფლის მეურნეობის მინისტრმა შვედეთის ელჩი დიანა იანსე მიიღო. დავით კირვალიძემ სტუმარს სამინისტროს პრიორიტეტები გააცნო და მიმდინარე პროექტებზე ესაუბრა. შვედეთის ელჩის განცხადებით, ამჟამად შვედეთის მხარდაჭერით საქართველოში მიმდინარე პროექტებს შორის სურსათის უსაფრთხოების დაცვისა და საბაზრო ლიბერალიზაციის ხელშეწყობის პროგრამებიცაა. მისი თქმით, შვედეთში მოქმედებს ვეტერინართა მოსამზადებელი კურსები და შვედური მხარე მოხარული იქნება ამ კურსებზე ქართველ სპეციალისტებს უმასპინძლოს. დიანა იანსემ დადებითად შეაფასა საქართველოს ხელისუფლების ხედვა და ქვეყნის განვითარებისთვის სოფლის მეურნეობის დარგის პრიორიტეტად გამოცხადება.
დავით კირვალიძის განცხადებით, სოფლის მეურნეობის სამინისტროს ბიუჯეტი წელს 60 პროცენტით გაიზარდა, რომლის დიდი ნაწილი საირიგაციო სისტემის გამართვას, ახალი ტექნიკის შეძენას და სოფლად კოოპერირების ხელშეწყობას მოხმარდება. როგორც მინისტრმა აღნიშნა, უკვე მიმდინარეობს შესაბამის კანონპროექტზე მუშაობა, რომელიც კოოპერირების პროცესში ყველა ფერმერს თანაბარ და სამართლიან პირობებში ჩააყენებს და ამასთან, გარკვეულ შეღავათებსაც შესთავაზებს.
შეხვედრას სოფლის მეურნეობის მინისტრის მოადგილე ილია კვიტაიშვილი და სურსათის ეროვნული სააგენტოს ხელმძღვანელი ზურაბ ჩეკურიშვილიც ესწრებოდნენ.
