ნოემბერში ინვესტიციების კლებას ეკონომიკისა და მდგრადი განვითარების მინისტრი ბუნებრივ მოვლენად აღიქვამს. როგორც გიორგი კვირიკაშვილი აცხადებს, დაუზუსტებელი მონაცემებით ქვეყანაში ინვესტიციების ტემპმა იკლო. „თუმც ეს არის ბუნებრივი მოვლენა, ინვესტორები, არამარტო ახალი, არამედ არსებული ინვესტორებიც, აკვირდებიან თუ რა მიმართულებით წავა პოლიტიკა, რა მესიჯები იქნება ბიზნესის მიმართ და აქედან გამომდინარე გეგმავენ შემდგომ მოქმედებებს. ბუნებრივია, რომ ერთთვიანი შეფერხება ამ მიმართულებით იყო"- აცხადებს მინისტრი.
გიორგი კვირიკაშვილის განმარტებით, 2013 წელს ქვეყნის ეკონომიკა გაიზრდება და მთავრობის გათვლებით მშპ-ს ზრდის ტემპი 6 %-ი, ხოლო 2014 წლისთვის ეკონომიკის ზრდა ორნიშნა რიცხვი იქნება.
„ვფიქრობ, რომ ზრდამ შესაძლოა ამ მაჩვენებელსაც გადააჭარბოს, იმ მონაცემებიდან გამომდინარე, რომელიც ფიქსირდება, პირდაპირი ინვესტიციების მიმართულებით. გუნდში ვიმსჯელეთ და 2 მლრდ დოლარი შესაძლოა რეალური ციფრი იყოს, იმ აქტიობებიდან გამომდინარე, რაც დღეს ფიქსირდება"- განმარტავს მინისტრი.
როგორც გიორგი კვირიკაშვილი აცხადებს საქართველოში ინვესტირებით უკვე დაინტერესებულნი არიან ბიზნესმენები ისრაელიდან, გერმანიიდან და აღმოსავლეთ ევროპიდან. მისივე განმარტებით, აზერბაიჯანული კომპანია საქართველოში 1 მლრდ დოლარის ინვესტირებას აპირებს.
