თურქეთში საქართველოს მოქალაქე დროებით საცხოვრებელ ბინაში გარდაცვლილი იპოვნეს. „გურია ნიუსი" წერს, რომ უბედური შემთხვევა თურქეთის ქალაქ ხოფაში მოხდა, სადაც საქართველოს მოქალაქე, ხელვაჩაურის რაიონის სოფელ მეჯინისწყალში მცხოვრები, 24 წლის არჩილ ზაქარაძე დროებით საცხოვრებელ ბინაში გარდაცვლილი იპოვეს. შემთხვევა გუშინ, გვიან ღამით მოხდა და გარდაცვლილი მის მოსანახულებლად საქართველოდან ჩასულმა ოჯახის წევრებმა და ახლობლებმა აღმოაჩინეს.
სიკვდილის მიზეზები ჯერჯერობით დაუდგენელია. გვამის აღმოჩენის დროისათვის, სხეული ჯერ კიდევ თბილი იყო და მას გარეგნული ძალადობის ნიშნები ან სხვა საეჭვო რამ არ ეტყობოდა. გარდაცვლილის ცხედარი ამ დროისათვის თურქმა სამართალდამცველებმა, ექსპერტიზის მიზნით, პროზექტურაში გადაასვენეს.
გარდაცვლილი საქართველოში სამართალდამცველების მიერ, ბათუმში თურქეთის მოქალაქის მკვლელობასთან დაკავშირებით იძებნებოდა, თუმცა, მისი ბრალეულობის დეტალები ამ ეტაპზე უცნობია. ამის გამო, გარდაცვლილი თავს საქართველოს საზღვართან ახლოს მდებარე თურქულ ქალაქ ხოფას აფარებდა.
დაღუპულის სამშობლოში გადმოსვენება სასაზღვრო პროცედურების მოგვარების შემდეგ, ხვალ ან ზეგ იგეგმება.
