"გარევაჭრობის შესახებ" საკანონმდებლო ინიციატივაზე დღეს დარგობრივი ეკონომიკისა და ეკონომიკური პოლიტიკის კომიტეტზე მსჯელობდნენ. კომიტეტის სხდომაზე დოკუმენტი ავტორმა, უფლებათადამცველმა ლაშა ჩხარტიშვილმა წარადგინა.
მისი განცხადებით, საკანონმდებლო წინადადება რამდენიმე წლის წინ მომზადდა და ავტორს მისი განხილვის მოთხოვნა წინა მოწვევის პარლამენტშიც ჰქონდა, თუმცა მას ამის საშუალება არ მიეცა. ჩხარტიშვილის ინფორმაციით, მან შეისწავლა და კანონპროექტში ასახა ევროპული და მსოფლიო წამყვანი ქვეყნების მიდგომა გარე ვაჭრობასთან დაკავშირებით. დოკუმენტი სწორედ, გარევაჭრობის განხორციელების წესებს და მისი ნებართვის გაცემის პროცედურებს განსაზღვრავს. მისი განცხადებით, კანონპროექტის მიღება 10 ათასამდე გარემოვაჭრის პრობლემას მოაგვარებს და აღნიშნული საქმიანობა კანონმდებლობით დარეგულირდება.
კომიტეტის თავმჯდომარის, ზურაბ ტყემალაძის მოსაზრებით, წარმოდგენილი ინიციატივა მეტად მნიშვნელოვანია, მაგრამ იგი საფუძვლიან შესწავლას და დახვეწას საჭიროებს.
მისი განცხადებით, კომიტეტში შეიქმნება სამუშაო ჯგუფი პარლამენტის წევრის, გია ჟორჟოლიანის ხელმძღვანელობით, რომელიც წინადადების ავტორთან და საკითხით დაინტერესებულ პირებთან ერთად შეისწავლის კომიტეტში გამოთქმულ შენიშვნებს და ადგილობრივი თვითმმართველობის წარმომადგენლების მოსაზრებებზედაც იმსჯელებს. იუსტიციის და ეკონომიკისა და მდგრადი განვითარების სამინისტროს წარმომადგენლები დაეთანხმნენ კომიტეტის თავმჯდომარის მოსაზრებას და საკითხის შემუშავების პროცესში ჩართვაზე მზადყოფნა გამოთქვეს.
კომიტეტის სხდომაზე ეკონომიკისა და მდგრადი განვითარების მინისტრის მოადგილემ, ნათია მიქელაძემ, II მოსმენით, "საქართველოს საჰაერო კოდექსში ცვლილების შეტანის შესახებ" კანონპროექტი წარმოადგინა. იუსტიციის მინისტრის მოადგილემ, ალექსანდრე ბარამიძემ კი კომიტეტის წევრებს "გადახდისუუნარობის საქმის წარმოების შესახებ" საქართველოს კანონში ცვლილების შეტანის თაობაზე" კანონპროექტი გააცნო, რომელიც ტექნიკური ხასიათის ცვლილებას მოიცავს და კანონის ამოქმედების ვადის გადაწევას გულისხმობს.
კომიტეტის წევრებმა კენჭი უყარეს წარმოდგენილ ორ კანონპროექტს და მხარი დაუჭირეს მის პლენარულ სხდომაზე გატანას.
