2013 წლის დასაწყისში საქართველო სასოფლო-სამეურნეო პროდუქციის უმსხვილეს გამოფენა "Green Week"-ში მიიღებს მონაწილეობას. სოფლის მეურნეობის სამინისტროში მიიჩნევენ, რომ აღნიშნულ გამოფენაში მონაწილეობა ქართული პროდუქციისთვის ევროპულ ბაზარზე შესასვლელად დიდი ფანჯარაა.
"Green Week"-ში მონაწილეობასა და სექტორის განვითარების პრიორიტეტებზე სოფლის მეურნეობის მინისტრი დავით კირვალიძე გერმანიის ელჩს ორთვინ ჰენიგს ესაუბრა.
„გარდა ფინანსური მხარდაჭერისა, რომელსაც საქართველო მისი მეგობარი ქვეყნებისგან და დონორი ორგანიზაციებისგან იღებს, ჩვენთვის არანაკლებ მნიშვნელოვანია იმ ქვეყნების გამოცდილების გაზირება, რომლებიც სოფლის მეურნეობის განვითარების მაღალი სტანდარტებით გამოირჩევიან", - აღნიშნა მინისტრმა გამართულ შეხვედრაზე.
ორთვინ ჰენიგმა დადებითად შეაფასა საქართველოს ხელისუფლების მიერ სოფლის მეურნეობის დარგის სახელმწიფო პოლიტიკის პრიორიტეტად დასახელება. „საქართველო აგრარული ქვეყანაა, ამიტომ მისასალმებელია, როცა ხელისუფლება მთავარ ამოცანად სწორედ ამ სფეროს განვითარებას ასახელებს", - განაცხადა გერმანიის ელჩმა.
სამინისტროს ინფორმაციით, შეხვედრაზე განიხილეს საქართველოს სოფლის მეურნეობის განვითარებისთვის მნიშვნელოვანი საკითხები. მხარეებმა განსაკუთრებული ყურადღება გაამახვილეს გერმანულ ბაზარზე ქართული სასოფლო-სამეურნეო პროდუქციის ფართომასშტაბიანი წარმოდგენის მნიშვნელობაზე. როგორც ორთვინ ჰენიგმა აღნიშნა, მომავალი წლის დასაწყისში დაგეგმილ სასოფლო-სამეურნეო პროდუქციის უმსხვილეს გამოფენა "Green Week"-ში მონაწილეობა ქართული პროდუქციისთვის ევროპულ ბაზარზე შესასვლელად დიდი ფანჯარაა.
