გავრცელებული ჩანაწერების გამოქვეყნების შემდეგ, „ნაციონალური მოძრაობის" გენერალური მდივანი დაკითხვაზე ჯერჯერობით არ დაუბარებიათ. როგორც ვანო მერაბიშვილმა განმარტა, ის ხელისუფლების მიერ წარმართულ დაკითხვის პროცესს საკმაოდ ირონიულად უყურებს.
მერაბიშვილის განმარტებით, ჩანაწერები, რომელშიც ის ფიგურირებს, მის დანაშაულს არ ამტკიცებს და ის პირიქით მისი უდანაშაულობის მტკიცებულებაა.
„მე პირადად ვერ გავიგე რატომ გამოქვეყნდა ჩემი ჩანაწერი, იმიტომ რომ ჩემი ჩანაწერი პირდაპირ ეწინააღმდეგება იმ ვერსიას, რომელიც გამოხატა გამოძიებამ. მე მგონია, რომ მათ ეს საუბარი მხოლოდ ერთი მიზეზის გამო გამოაქვეყნეს: რომ გვითხრან, რომ ჩვენ გაკონტროლებთ, გისმენთ და ჩვენი მიზანია დაშინება. მე მინდა მათ ვუთხრა, რომ წლების განმავლობაში, ჩემი არაერთი სატელეფონო საუბარი გამოქვეყნდა, რუსეთის სპეცსამსახურების მიერ, როდესაც მე ვიმყოფებოდი უცხოეთში. დიდიხანია შეჩვეული ვარ, რომ ტელეფონით სერიოზულ თემებზე არ ვისაუბრო. აქედან გამომდინარე, როდესაც მე აღარ ვარ სახელმწიფო მოხელე და ყველაფერი იმაზე, რასაც მე ჩუმად ჩემს მეგობრებთან ვლაპარაკობ, რამდენიმე ხანში ამას პრესსკონფერენციაზე ვაცხადებთ. ამიტომ მე არაფერი დასამალი არ მაქვს, მე არ მეშინია და მათ შეუძლიათ თავისუფლად მომისმინონ. ეს უფრო იყო დეკლარირება იმის, რომ „ჩვენ გისმენთ"_ აცხადებს მერაბიშვილი.
