ბათუმის 2013 წლის ბიუჯეტი მიმდინარე წელთან შედარებით, 2,5-ჯერ შემცირებულია. როგორც დღეს გამართულ ბრიფინგზე ბათუმის მერმა ჯემალ ანანიძემ განაცხადა, ბათუმის მომავალი წლის მთავარი ფინანსური დოკუმენტი 87 მილიონი ლარით განისაზღვრა. მერის ინფორმაციით, 2013 წლიდან ქალაქში ინფრასტრუქტურული პროექტების დაფინანსება 125 მილიონი ლარით მცირდება.
დღესვე ბათუმის მერის განცხადებას აჭარის ფინანსთა და ეკონომიკის მინისტრი გამოეხმაურა. როგორც "აჭარის ტელევიზია" იუწყება, მომავალი წლის პრიორიტეტები შეზღუდული ფინანსური რესურსის ფარგლებში გადანაწილდა, რაც აჭარის მთავრობის ნაერთი ბიუჯეტის შემცირებითაა გამოწვეული.
მინისტრის განცხადებით, ქალაქის განვითარებისთვის აუცილებელი პროექტები თვითმმართველობის ბიუჯეტში ჩადებულია, თუმცა, არ არის გამორიცხული, წინა წლების მსგავსად, ცენტრალური ბიუჯეტიდან სპეცტრანსფერი გამოიყოს.
