საქართველოს დელეგაციას საბჭოს სხდომაზე ხელმძღვანელობდა საგარეო საქმეთა მინისტრი მაია ფანჯიკიძე. შეხვედრაში მონაწილეობდნენ, აგრეთვე, ქართული მხრიდან - ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი; სახელმწიფო მინისტრის მოადგილე თამარ ბერუჩაშვილი; იუსტიციის მინისტრის მოადგილე გოჩა ლორთქიფანიძე; ევროკავშირის მხრიდან - ევროკომისარი გაფართოებისა და ევროპული სამეზობლო პოლიტიკის საკითხებში შტეფან ფულე; ევროკავშირის საგარეო ქმედებათა ევროპული სამსახურის მმართველი დირექტორი ევროპისა და ცენტრალური აზიის საკითხებში ლუის ფელიპე ფერნანდეს დე ლა პენია; სამხრეთ კავკასიასა და საქართველოს კრიზისის საკითხებში ევროკავშირის სპეციალური წარმომადგენელი ფილიპ ლეფორი; საქართველოში ევროკავშირის დელეგაციის ხელმძღვანელი, ელჩი ფილიპ დიმიტროვი.

თანამშრომლობის საბჭოს პლენარულ სესიაზე განხილულ იქნა საქართველო-ევროკავშირის თანამშრომლობის პრიორიტეტული თემები "აღმოსავლეთ პარტნიორობის" ორმხრივ და მრავალმხრივ ფორმატებში, ასევე ევროპული სამეზობლო პოლიტიკის საქართველო-ევროკავშირის სამოქმედო გეგმის განხორციელებაში მიღწეული პროგრესი; საქართველოში უსაფრთხოების კუთხით არსებული სიტუაცია და ამ მხრივ ევროკავშირის როლის შემდგომი გააქტიურების მნიშვნელობა. შეხვედრისას მხარეებმა ისაუბრეს საქართველოს ახალი მთავრობის პრიორიტეტებზე დემოკრატიისა და კანონის უზენაესობის განმტკიცების, ადამიანის უფლებათა დაცვის, ასევე ეკონომიკური რეფორმების განხორციელების თვალსაზრისით.

ევროკავშირი მიესალმა საქართველოში 1-ელ ოქტომბერს გამართული საპარლამენტო არჩევნების შედეგად საკანონმდებლო და აღმასრულებელი ხელისუფლების ცვლილებას მშვიდობიანი და დემოკრატიული გზით. ამასთანავე, ევროკავშირმა დადებითად შეაფასა საქართველოს ახალი მთავრობის მზაობა, გააგრძელოს ევროპულ და ევროატლანტიკურ სტრუქტურებში ინტეგრაციისაკენ სწრაფვა.

თანამშრომლობის საბჭოს სხდომაზე მხარეებმა დადებითად შეაფასეს გასული ერთი წლის განმავლობაში საქართველო-ევროკავშირის ორმხრივ თანამშრომლობაში მიღწეული პროგრესი. სხდომაზე ხაზი გაესვა 2013 წლის მეორე ნახევარში ქ. ვილნიუსში დაგეგმილი "აღმოსავლეთ პარტნიორობის" რიგით მესამე სამიტის მნიშვნელობას საქართველო-ევროკავშირის თანამშრომლობის შემდგომი გაღრმავების თვალსაზრისით. მხარეებმა იმედი გამოთქვეს, რომ აღნიშული სამიტისათვის მიღწეული იქნება კონკრეტული შედეგები რიგი მნიშვნელოვანი პრიორიტეტების კუთხით, მათ შორის დასრულდება მოლაპარაკებები ასოცირების შესახებ შეთანხმებაზე, ღრმა და ყოვლისმომცველი თავისუფალი სავაჭრო ზონის ჩათვლით. ქართულმა მხარემ განაცხადა მზაობა შესაბამისი ძალისხმევისათვის "აღმოსავლეთ პარტნიორობის" სამიტამდე სავიზო რეჟიმის ლიბერალიზაციის სამოქმედო გეგმის განხორციელების დასკვნით ეტაპამდე მიყვანის მიზნით. ამ კონტექსტში, ქართულმა მხარემ გამოთქვა იმედი, რომ ევროკომისარი საშინაო საქმეებში სესილია მალმსტრომი 2013 წლის დასაწყისში ეწვევა საქართველოს სავიზო რეჟიმის ლიბერალიზაციის სამოქმედო გეგმის ქართული მხარისათვის გადაცემის მიზნით.

მხარეებმა დადებითად შეაფასეს ევროპული სამეზობლო პოლიტიკის საქართველო-ევროკავშირის სამოქმედო გეგმის განხორციელების პროცესი. იმის გათვალისწინებით, რომ ასოცირების შესახებ შეთანხმებაზე მოლაპარკებები დასასრულს უახლოვდება, მხარეებმა გამოთქვეს მზაობა, დაიწყოს მუშაობა ახალი, უფრო მაღალი დონის დოკუმენტის - ე.წ. "ასოცირების დღის წესრიგის" შემუშავების, მიზნით, რომელიც ჩაანაცვლებს ევროპული სამეზობლო პოლიტიკის სამოქმედო გეგმას.

თანამშრომლობის საბჭოს სხდომის ფარგლებში ყურადღება დაეთმო საქართველოში უსაფრთხოების კუთხით არსებულ სიტუაციასა და ამ კუთხით, ევროკავშირის როლის მნიშვნელობას. შეხვედრისას, ევროპულმა მხარემ კიდევ ერთხელ დაადასტურა მისი მხარდაჭერა საქართველოს დამოუკიდებლობის, სუვერენიტეტისა და საერთაშორისოდ აღიარებულ საზღვრებში ქვეყნის ტერიტორიული მთლიანობის მიმართ. განსაკუთრებით აღინიშნა ევროკავშირის ძალისხმევა საქართველოს ოკუპირებული ტერიტორიების მიმართ "არაღიარების" პოლიტიკის პრაქტიკული განხორციელების თვალსაზრისით. მხარეებმა ისაუბრეს ჟენევის მოლაპარაკებების მნიშვნელობასა და მისი არსებული ფორმატით გაგრძელების აუცილებლობაზე. ხაზი გაესვა ევროკავშირის მონიტორინგის მისიის, როგორც ადგილზე არსებული ერთადერთი საერთაშორისო ინსტრუმენტის მნიშვნელობას და ეფექტურობას; ქართული მხარე მიესალმა ევროკავშირის მონიტორინგის მისიის მანდატის გაგრძელებას 2013 წლის 14 სექტემბრამდე; აღინიშნა საქართველოს ოკუპირებულ ტერიტორიებზე მისიის შეღწევის აუცილებლობა, მისი მანდატის სრულყოფილად განხორციელების მიზნით. სხდომაზე ევროკავშირის მიერ აღინიშნა რუსეთის მხრიდან 2008 წლის 12 აგვისტოს ცეცხლის შეწყვეტის შესახებ შეთანხმებით ნაკისრი ვალდებულებების შესრულების აუცილებლობა.

სხდომის დასრულების შემდეგ გაიმართა ერთობლივი პრესკონფერენცია.