"მივმართავ საქართველოს სამართალდამცავ ორგანოებს, იმერეთის პოლიციაა ეს თუ შს მინისტრი, რომ პარლამენტს დაუყოვნებლივ მოხსენდეს იმის თაობაზე, თუ რა მოხდა დღეს 4-იდან 5 საათამდე ქუთაისში, "ნაციონალური მოძრაობის ოფისთან" და პარლამენტის წევრებთან ვის ჰქონდა ფიზიკური შეხლა-შემოხლა", _ აცხადებს პარლამენტის თავმჯდომარე და აღნიშნავს: "თუ ჩვენ, ხელისუფლებამ, აღმასრულებელმაც და საკანონმდებლობაც, ერთხელ და სამუდამოდ არ დავამკვიდრეთ რაღაც სტანდარტი ამ ქვეყანაში, მაშინ ძალინ მალე ძალიან ცუდ შედეგებს მივიღებთ".

უსუფაშვილი აცხადებს, რომ უმრავლესობის მოვალეობაა, უმსგავსობა აღკვეთოს.

"უმრავლესობის მოვალეობაა, აღკვეთოს ეს უმსგავსოება, თუ ეს ის იყო, რასაც მეუბნებიან", _ აცხადებს უსუფაშვილი.

შეგახსენებთ, რომ ხმაურით დასრულდა დღეს პრეზიდენტის შეხვედრა ქუთაისის საკრებულოს წევრებთან. შეხვედრიდან გამოსულ მიხეილ სააკაშვილს და უმცირესობის წევრებს აქციის მონაწილეები დახვდნენ, რომლებიც დეპუტატებს სიტყვიერ შეურაცხყოფას აყენებდნენ. იყო ფიზიკური დაპირისპირების ფაქტებიც. მას შემდეგ, რაც პრეზიდენტის ესკორტმა შეხვედრის ადგილი დატოვა, აქციის მონაწილეებმა იერიში აკაკი მინაშვილზე მიიტანეს. მერიის წინ მომიტინგეთა ჯგუფი მიხეილ სააკაშვილის გადადგომის მოთხოვნით იყო შეკრებილი.

ამას გარდა, ინციდენტი მოხდა "ერთიანი ნაციონალური მოძრაობის" ქუთაისის ოფისთან, სადაც სააკაშვილი საპარლამენტო უმცირესობის წარმომადგენლებს ხვდებოდა. აქციის მონაწილეებმა სააკაშვილის ესკორტს ქვები დაუშინეს.