"რაც დღეს საქართველოში ხდება, არის დროებითი მოვლენა, რომელიც ფუნდამენტურად ეწინააღმდეგება დემოკრატიის მთავარ ნორმებს. ბოლო ცხრა წელიწადში შევქმენით ქართული სახელმწიფოებრიობა, ცარიელ, დანგრეულ ადგილზე. ქართული სახელმწიფოებრიობის უმნიშვნელოვანესი ნაწილი არის ქართული სახელმწიფო ინსტიტუტები, რომელიც ეფუძნება კანონის უზენაესობას და არა ბრბოს, თვითნებობას და ბრბოს კარნახს. კანონის უზენაესობა არის ხალხის სამსახური, ერის სამსახური. ბრბო ემსახურება ცალკე აღებულ დროებითი პიროვნებების, თანამდებობების პირების ინტერესებს. ამიტომ ვერანაირი 200, 100, 500 კაცი სახელმწიფო ინსტიტუტებს ვერ ჩაანაცვლებს. სახელმწიფო ინსტიტუტები ეფუძნება იმას, რომ ეს არის გრძელვადიანი - 2012 წელს არჩეული და იქნება 2014 წლამდე. 2013 წელს ჩვენ გვაქვს საპრეზიდენტო არჩევნები, 2014 გვაქვს ადგილობრივი არჩევნები, მანამდე არავის არ აქვს უფლება შეეხოს ადგილობრივ ინსტიტუტებს", - განაცხადა სააკაშვილმა და აღნიშნა, რომ ქუთაისში ადგილობრივი თვითმმართველობის წარმომადგენლები "შეთითხნილი ბრალდებით დააპატიმრეს".

პრეზიდენტის განცხადებით, "ქართულ ოცნებას" ადგილობრივი თვითმმართველობის არჩევნებში გამარჯვების შანსი არა აქვს.

"იმ ხალხმა ვინც ჩქარობს, იცის ერთი რამ: 2014 წელს მათ შანსი ადგილობრივ არჩევნებში არ ექნებათ. მეტსაც გეტყვით: 2013 წელის ბოლოსაც არ აქვთ შანსი და ამიტომ არ მოსწონთ თუნდაც ის, რომ პრეზიდენტი ჯერ კიდევ თანამდებობაზე ვარ, მაგრამ მინდა ვთქვა, რომ ბოლომდე თქვენთან ერთად, ვიბრძოლებ იმისთვის, რომ საქართველომ განვითარება არ გააჩეროს", - განაცხადა სააკაშვილმა.