საერთაშორისო სავალუტო ფონდის პროგნოზით მთლიანი შიდა პროდუქტის ზრდამ 2013 წლისთვის შეიძლება 6 პროცენტს მიაღწიოს. ფონდის აზრით, აღნიშნული პროგნოზი შეიძლება ორმხრივად შეიცვალოს. ერთის მხრივ, ზრდის მიმართულებით, ეს არის: რუსეთთან ვაჭრობის გაზრდის ალბათობა და უცხოური ინვესტიციების ახალ წყაროების მოძიება; ხოლო მეორეს მხრივ, თუ არსებული გაურკვევლობები გაგრძელდება ან ქვეყნის სავაჭრო პარტნიორების მხრიდან მოთხოვნა შემცირდება საქართველოს ეკონომიკური ზრდა შეიძლება შენელდეს. საჭიროა ძლიერი შიდა პოლიტიკა და კომუნიკაცია, ნდობის ზრდისა და ბაზრის მონაწილეთა დასარწმუნებლად რომ საქართველოს ახალი მთავრობა იღებს ვალდებულებას წინდახედული მაკროეკონომიკური პოლიტიკის განხორციელებაზე და ბიზნეს გარემოს შემდგომ გაუმჯობესებაზე.
„ინფლაცია ძალიან დაბალი იყო 2012 წელს, რაც განპირობებული იყო ლარის ადრინდელი ნომინალური გამყარებით ქვეყნის ძირითადი სავაჭრო პარტნიორების ვალუტათა მიმართ და გასულ 12 თვეში სურსათზე ფასების კლებით. ამ დროებითი ფაქტორების გავლენის გაქრობის შემდეგ მისიის პროგნოზით ინფლაცია გაიზრდება ნოემბერში არსებული წლიური -0.5 პროცენტიდან წლიურ 4 პროცენტამდე 2013 წლის ბოლოსთვის, ხოლო შემდგომ, ეტაპობრივად, საქართველოს ეროვნული ბანკის საშუალოვადიანი ინფლაციის მიზნობრივ მაჩვენებელს მიუახლოვდება. მისიას მიაჩნია, რომ არსებული ფულად-საკრედიტო პოლიტიკა, მათ შორის ოფიციალური საპროცენტო განაკვეთების ბოლოდროინდელი შემცირება, მთლიანობაში ჯეროვანია და შეესაბამება ინფლაციის პროგნოზირებულ ზრდას"- აცხადებს საქართველოში საერთაშორისო სავალუტო ფონდის მისიის ხელმძღვანელიმარკ გრიფიტსი.
