დღეს, 19 დეკემბერს, 11:00 საათზე, თსუ ეკონომიკის საერთაშორისო სკოლა (ISET-აისეტი) გამართავს საქართველოს მაკროეკონომიკური ყოველთვიური მიმოხილვის პრეზენტაციას. ეს არის მაკროეკონომიკური ანგარიში, რომელიც მზადდება ISET-ის კვლევით ინსტიტუტის მიერ, საქართველოს ეროვნულ ბანკთან ერთად. პრეზენტაციას გახსნის ივ. ჯავახიშვილის სახელობის თბილისის სახელმწიფო უნივერსიტეტის რექტორი ალექსანდრე კვიტაშვილი; ანგარიშის შესახებ მოკლე ინფორმაციას წარადგენენ საქართველოს ეროვნული ბანკის ვიცე პრეზიდენტი არჩილ მესტვირიშვილი და საქართველოს ეროვნული ბანკის პრეზიდენტის მრჩეველი და აისეტის კვლევითი ინსტიტუტის უფროსი მკვლევარი გიორგი ბაქრაძე.
პრეზენტაცია მოიცავს: საქართველოს ეკონომიკის შესახებ ზოგადი სურათის წარმოდგენას; საქართველოს ეკონომიკის ყოველთვიურ სექტორულ ანალიზს; მოცემული თვის განმავლობაში მომხდარი ეკონომიკური მოვლენებისა და შოკების იდენტიფიცირებას და მათ ახსნას; ქვეყნის ეკონომიკაში მიმდინარე ეკონომიკური ტენდენციების ანალიზს.
დოკუმენტში განხილულია ის ეკონომიკური მოვლენები, რომელთაც ადგილი ჰქონდათ საქართველოში მოცემული თვის განმავლობაში. მასში თანმიმდევრულად არის განხილული ქვეყნის ეკონომიკის რეალური, მონეტარული, ფისკალური, ფინანსური და საგარეო სექტორები. მაკროეკონომიკური ანგარიში ასევე განიხილავს მსოფლიო ეკონომიკაში მომხდარ იმ მოვლენებს, რომლეთაც გავლენა მოახდინეს საქართველოზე. საქართველოს მაკროეკონომიკის ყოველთვიური მიმოხილვა წარმოადგენს მოკლე, მაგრამ ინფორმაციულად და ანალიტიკურად მდიდარ დოკუმენტს, რომელშიც ხელმისაწვდომი ფორმით არის მოცემული საქართველოს მიმდინარე ეკონომიკური მდგომარეობის ანალიზი. ანგარიში განკუთვნილია პოლიტიკოსებისთვის, მენეჯერებისა და ფართო საზოგადოებისთვის.
