როგორც ასათიანმა განმარტა, ახლახან დასრულდა „იდუმალი მომხმარებლის" პროგრამის ახალი ტალღა, რომელიც პერსონალური კომპიუტერებით მოვაჭრე კომპანიების საბაზრო კვლევის მეშვეობით განხორციელდა. კერძოდ, სთავაზობდნენ და ყიდდნენ თუ არა აღნიშნული კომპანიები თავიანთ მომხმარებელზე მაიქროსოფთის არალიცენზირებულ პროდუქციას.

კორპორაცია „მაიკროსოფთი" გეგმავს, „ბიზნეს სოფტვეარ ალიანსის" (BSA) წარმომადგენლებს და სამართალდამცავ ორგანოებს მიაწოდოს ინფორმაცია „მაიკროსოფთის" საავტორო უფლებების დამრღვევთა შესახებ სამართლებრივი მექანიზმების ადგილობრივი კანონების შესაბამისად ასამოქმედებლად.

საქართველოში „იდუმალი მომხმარებლის" პროგრამის მორიგი ეტაპის ფარგლებში სატელეფონო ზარების და პერსონალური ვიზიტების მეშვეობით 40 მაღაზია შეფასდა, საიდანაც პერსონალური კომპიუტერი ლიცენზირებული Windows-ის ასლებით და აუთენტურობის დამადასტურებელი სერტიფიკატით (COA), რომელიც ტექნიკურ აღჭურვილობას მოჰყვება მხოლოდ 25 მაღაზიაში აღმოჩნდა, თუმცა აღნიშნულ მაღაზიებშიც კონსულტანტები თავიანთ მომხმარებელს მაინც არალიცენზირებული პროგრამული უზრუნველყოფის შეძენისაკენ მოუწოდებდნენ. ხოლო, შემოწმებული 15 მაღაზია კი, ღიად სთავაზობდნენ მომხმარებლებს პერსონალურ კომპიუტერებს მხოლოდ პროგრამული უზრუნველყოფის პირატული ასლებით, ამასთანავე, პერსონალურ კომპიუტერებს არ გააჩნდათ აუთენტურობის დამადასტურებელი სერტიფიკატი (COA), რომელიც მიუთითებდა პროგრამული უზრუნველყოფის ნამდვილობას.

კვლევის შედეგად აღმოჩნდა, რომ პერსონალური კომპიუტერებით მოვაჭრე მაღაზიების 93%-ი აინსტალირებდა „მაიქროსოფთის" პირატულ პროგრამას შესაბამისი ლიცენზიის გარეშე და გამყიდველების მხოლოდ 7%-ი სთავაზობდა მომხმარებელს „მაიქროსოფთის" ლიცენზირებული პროგრამული უზრუნველყოფის ინსტალაციას. ასევე, 10 გამყიდველიდან 9 მომხმარებელს რეკომენდაციას აძლევდა სხვა წყაროების შესახებ, სადაც მათი განმარტებით შესაძლებელი იყო არალეგალური პროგრამული უზრუნველყოფის ინსტალაცია.

ირკვევა, რომ მომხმარებლები რისკის ქვეშ დგანან, მათთვის უცნობია, რომ არალიცენზირებული პროგრამული უზრუნველყოფით საავტორო უფლებებთან დაკავშირებული საქართველოს კანონები ირღვევა. კანონის დარღვევის გარდა, ისინი შეიძლება აღმოჩნდნენ ტექნიკური და უსაფრთხოებასთან დაკავშირებული პრობლემების წინაშე მათ კომპიუტერებზე პირატული პროგრამების ფუნქციონირების შემთხვევაში.

„ორ წელზე მეტია რაც კომპიუტერულ მაღაზიებთან ჩვენი თანამშრომლობა გრძელდება. მათ ყველანაირად ვეხმარებით ტრეინინგებში, ასევე ვეხმარებით წახალისების პროგრამებში კონსულტანტებს. ჩვენ ყველანაირად ვცდილობთ ავუხსნათ ბენეფიტი ლეგალურის და არალეგალურის. თუმც სამწუხაროდ პროცესი ძალიან ნელა მიმდინარეობს და ჩვენ, როგორც ინტელექტუალური საკუთრების მქონეს, გვჭირდება გადავდგათ ისეთი ნაბიჯები, რომ ეს მესიჯები მივიდეს იმ ხალხთან ვისთვისაც ისაა გამიზნული. კომპიუტერულ მაღაზიებში წელიწადში 130 ათასი პერსონალური კომპიუტერი იყიდება და სწორედ იქ იქმნება ყველაზე დიდი ბუდე პირატობის"- განმარტავს „მაიქროსოფთ საქართველოს" გენერალური დირექტორი.

დავით ასათიანი ამ ეტაპისთვის არ აკონკრეტებს იმ კომპიუტერულ მაღაზიებს, სადაც პროგრამის ფარგლებში კომპიუტერების შესყიდვა განხორციელდა, თუმც განმარტავს, რომ შესწავლის შემდეგ, დარღვევის აღმოჩენის შემთხვევაში, საქმე შემდგომი განხილვისთვის სასამართლოში გადაიგზავნება.

„IDC-ის მიერ 2011 წელს განხორციელებული პირატული პროგრამული უზრუნველყოფის გლობალური კვლევის თანახმად, საქართველოში გამოყენებული პროგრამების 91%-ი არალიცენზირებულია და ქვეყანას ცენტრალურ და აღმოსავლეთ ევროპაში უმაღლესი, მსოფლიოში კი რიგით მეორე მაჩვენებელი აქვს.

უნდა აღინიშნოს, რომ IDC-ის მიერ 2011 წელს განხორციელებული პირატული პროგრამული უზრუნველყოფის გლობალური კვლევის თანახმად, საქართველოში გამოყენებული პროგრამების 91%-ი არალიცენზირებულია და ქვეყანას ცენტრალურ და აღმოსავლეთ ევროპაში უმაღლესი, მსოფლიოში კი რიგით მეორე მაჩვენებელი აქვს.

„მაიქროსოფთ საქართველოს" მიერ განხორციელებული მრავალი საგანმანათლებლო ღონისძიების მიუხედავად, ბოლო რამდენიმე წლის განმავლობაში, პერსონალური კომპიუტერების გამყიდველი მაღაზიების უმრავლესობა ქვეყანაში კვლავაც აგრძელებს კომპიუტერების გაყიდვას პირატული პროგრამებით. დროა განხორციელდეს გაცილებით სერიოზული ღონისძიებები," - აღნიშნა „მაიქროსოფთის" ცენტრალური და აღმოსავლეთ ევროპის ოფისის ბიზნესის განვითარების დირექტორმა, ევგენი დანილოვმა.

„მაიქროსოფთ საქართველო" თავის პარტნიორებთან ერთად მუშაობს სადილერო ქსელის გასაწმენდად და იმ მომხმარებელთა არაინფორმირებულობის დონის შესამცირებლად, რომლებიც პერსონალურ კომპიუტერებს „მაიქროსოფთის" პირატული პროდუქტებით ყიდულობენ.

„არალიცენზირებული პროგრამული უზრუნველყოფის გამოყენებას შეიძლება შედეგად მოჰყვეს მომხმარებლისთვის სერიოზული სამართლებრივი, უსაფრთხოების და ტექნიკური რისკები. პირატული პროგრამით პერსონალური კომპიუტერის შეძენისას მომხმარებელი ვერ შეძლებს მწარმოებლის მიერ მოწოდებული მნიშვნელოვანი განახლებების ინსტალაციას და აღმოჩნდება მონაცემთა უსაფრთხოების და სისტემის სანდოობის რისკის წინაშე. პირატული პროდუქციით ვაჭრობა არ არის პრესტიჟული თვითონ კომპიუტერების გადამყიდველებისთვისაც კი, რადგან ის ამახინჯებს სამართლიან კონკურენციას და მნიშვნელოვნად ზრდის შემოწმების რისკს სამართალდამცავი ორგანოების მხრიდან. ამ მიზეზით უკვე არსებობს უამრავი კომპანია, რომელთაც სურთ სამართლიანი თამაშის წესები, ისინი არ სთავაზობენ და არ აინსტალირებენ პირატულ ვერსიებს მომხმარებლების მხრიდან მოთხოვნის არსებობის შემთხვევაშიც კი," - განაცხადა „მაიქროსოფთ საქართველოს" გენერალურმა მენეჯერმა დავით ასათიანმა.

„მაიქროსოფთ საქართველოს ოფისი აქტიურად ვმუშაობთ ჩვენს დისტრიბუტორებთან და პარტნიორებთან ერთად იმ მიმართულებით, რომ მაქსიმალურად დავეხმაროთ პერსონალური კომპიუტერის ყველა მყიდველს იმის გარკვევაში, თუ რომელი პროგრამული უზრუნველყოფა არის დაინსტალირებული კონკრეტულ კომპიუტერზე და აქვს თუ არა მას აუთენტურობის დამადასტურებელი სერტიფიკატი (COA). მხოლოდ ნამდვილი პროდუქტის შეძენით შეუძლია მომხმარებელს, მიიღოს სრული სარგებელი და შესაძლებლობები ინვესტიციიდან," - აცხადებს „მაიქროსოფთ საქართველოს" საპარტნიორო ქსელის მენეჯერი, გიორგი ბრეგაძე.

„საქპატენტის" პატენტების დეპარტამენტის უფროსის ზვიად მათიაშვილის განმარტებით, ბოლო პერიოდში მისი უწყება საავტორო უფლებების დასაცავად და პირატული პროგრამების წინააღმდეგ გააქტიურდა.
„ჩვენი ამოცანაა ვითანამშრომლოთ ყველასთან ვინც ასე თუ ისე შეხებაშია ინტელექტუალური საკუთრების დაცვასთან. ბოლო წლებში განსაკუთრებული აქტუალურობა შეიძინა ქვეყანაში „მაიქროსოფთისა" და სხვა მსგავსი ინტელექტუალური საკუთრების დაცვამ, ამ კუთხით ჩვენ ვთანამშრომლობთ არამარტო ბიზნესსექტორთან, არამედ სამოქალაქო სექტორთან, ზოგადად საზოგადოებასთან. ჩვენი ძირითადი მიზანი ამ კუთხით არის ცნობიერების ამაღლება, რათა საზოგადოებაში მოხდეს ფასეულობათა გადაფასება, აღქმა პირატულის და არაპირატულის და მათ შორის არსებული სხვაობის მკვეთრი გაცნობიერება. მინდა ავღნიშნო, რომ ეს პროცესი უნდა იყოს მაქსიმალურად უმტკივნეულო, ამ მიმართულებით სათანადო საკანონმდებლო ბაზა გვაქვს და მთავარ პრობლემად რჩება ამ მექანიზმების აღსრულება. ჩვენ მოვუწოდებთ ყველას მოექცნენ კანონის ფარგლებში. ჩვენ მხარს ვუჭერთ ყველა იმ ინიციატივას, რომელიც მიმართული იქნება ინტელექტუიალური საკუთრების დაცვასთან"- აცხადებს ზვიად მათიაშვილი.
„იდუმალი მომხმარებლის" მიმდინარე პროგრამის შედეგებიდან გამომდინარე, კორპორაცია „მაიქროსოფთი" აპირებს პრობლემის დარეგულირებას შემოწმებული კომპანიების მენეჯმენტთან უშუალო კონტაქტის გზით.

როგორც კომპანიაში აცხადებენ, თუ გამოვლენილი ფაქტები არ აღმოიფხვრა და უკანონო ქმედებები მომავალშიც გაგრძელდა, განხორციელდება შესაბამისი სამართლებრივი ღონისძიებები. „იდუმალი მომხმარებლის" პროგრამა 2013 წელსაც გაგრძელდება. ასევე, მნიშვნელოვნად გაიზრდება და გაფართოვდება შემოწმებების რაოდენობა და პროგრამის განხორციელების გეოგრაფიული არეალიც.

შეგახსენებთ, რომ კომპანია „მაიქროსოფთი" დაარსდა 1975 წელს (Nasdaq "MSFT") და ის მსოფლიო ლიდერია პროგრამული უზრუნველყოფის, მომსახურების და გადაწყვეტების სფეროში, რომელიც ეხმარება ადამიანებს და ბიზნესებს მათი სრული პოტენციალის რეალიზაციაში. „მაიქროსოფთ საქართველო" 2007 წლიდან ფუნქციონირებს. მისი მიზანია კორპორაციული კლიენტებისთვის და ფიზიკური პირებისთვის ლიცენზირებული პროგრამული უზრუნველყოფის შეთავაზების ხელშეწყობა.

„მაიქროსოფთის" ორიგინალი პროგრამული უზრუნველყოფის შესახებ დამატებითი ინფორმაციის მისაღებად მომხმარებლებს შეუძლიათ იხილონ ვებგვერდი: http://www.microsoft.com/en-gb/howtotell/.