შსს-ს ინფორმაციით, 2012 წლის 10 დეკემბერს საქართველოს შსს ქ.თბილისის მთავარი სამმართველოს დეტექტივების სამმართველოსა და სამეგრელო-ზემოსვანეთის სამხარეო მთავარი სამმართველოს თანამშრომელთა მიერ ერთობლივად გატარებული ოპერატიულ-სამძებრო ღონისძიებების შედეგად დაკავებულ იქნა პირი, რომელმაც მიმდინარე წლის 23 ნოემბერს დანისა და ცეცხლსასროლი იარაღის გამოყენებით ჩაიდინა 35 წლის ანტონ ალექსანდრეს ძე ადუაშვილის განზრახ მკვლელობა.

მათი ინფორმაციით, აღნიშნული დანაშაულის დაფარვისთვის დაკავებულია ორი პირი. გრძელდება ოპერატიულ-სამძებრო ღონისძიებები დანაშაულის ჩადენაში მონაწილე სხვა პირთა დადგენა-დაკავების მიზნით. საქმეზე გამოძიებას აწარმოებს საქართველოს შსს ქ.თბილისის მთავარი სამმართველოს დეტექტივების სამმართველო.

შეგახსენებთ, რომ თბილისში, ზაზიაშვილის ქუჩაზე, მკვლელობა 23 ნოემბერს მოხდა. თეთრი ფერის მერსედესის ემ-ელის მარკის ავტომობილში მამაკაცის ცხედარი ნახეს. ცხედარი მანქანის უკანა სავარძელზე იპოვეს. ვარაუდობდნენ, რომ მკვლელობა ზაზიაშვილის ქუჩაზე არ მომხდარა და ის სხვა ადგილიდან მიიყვანეს და იქ დატოვეს. მამაკაცს, სავარაუდოდ, სამი ტყვია აქვს ნასროლი, ერთი შესაძლოა, იყოს საკონტროლო. მკვლელობის მოტივი უცნობია. ადუაშვილის ახლობლების განცხადებით, იგი სხვადასხვა სახის ბიზნესსაქმიანობას ეწეოდა.