ებრაული მხარე ჯვრის მონასტერზე დატოვებული წარწერების გამო წუხილს გამოთქვამს. როგორც საგარეო საქმეთა მინისტრმა მაია ფანჯიკიძემ განაცხადა, აღნიშნულთან დაკავშირებით გამოძიება დაწყებულია.
"ისრაელმა გამოთქვა წუხილი ჯვრის მონასტერზე შეურაცხმყოფელი სიტყვების დატოვების ფაქტზე. აღნიშნულის შესახებ ჩვენმა ელჩმა შეგვატყობინა. მან მაშინე მიმართა შესაბამის სამსახურებს და მიმდინარეობს გამოძიება", _ განაცხადა ფანჯიკიძემ.
შეგახსენებთ, რომ უცნობმა ვანდალებმა ღამით იერუსალიმის ჯვრის მონასტრის კედელი შეურაცხყვეს. მათ კედელზე დატოვეს წარწერა: „იესო - მეძავის შვილი", ხოლო იქვე გაჩერებულ ავტომობილზე წააწერეს: „გილოცავთ ხანუქას!".
იერუსალიმის პოლიციამ უკვე დაიწყო ინციდენტის გამოძიება. როგორც სააგენტო იუწყება, ეს შემთხვევა უკვე მეორეა, როცა ვანდალებმა შეურაცხყოფისთვის ჯვრის მონასტერი აირჩიეს. მსგავსი შემთხვევა 2010 წლის თებერვალშიც მოხდა და მაშინაც მონასტრის კედელზე წარწერები ივრითულად იქნა დატოვებული.
იერუსალიმის ჯვრის მონასტერი შუა საუკუნეების ქართული რელიგიური და კულტურულ-საგანმანათლებლო ცენტრი იყო საზღვარგარეთ, რომელიც ქართველმა მოღვაწემ გიორგი-პროხორე შავთელმა საქართველოს სამეფო კარის მხარდაჭერითა და დახმარებით XI საუკუნის 30-50-იან წლებში დააარსა. იგი მდებარეობდა იერუსალიმის სამხრეთ-დასავლეთით (ახლა ქალაქის გაზრდის გამო მის ფარგლებში მოექცა).
ამჟამად, მონასტერი მაღალი ზღუდით შემოვლებული ხუროთმოძღვრული კომპლექსია. ზღუდის შიგნით კი სამ და ოთხსართულიანი სხვადასხვა დანიშნულების ნაგებობებია. ძეგლი, დღესდღეობით, საბერძნეთის მართლადიდებლურ ეკლესიას ეკუთვნის.
