პარლამენტის წევრი და ყოფილი პროკურორი დავით საყვარელიძე ფინანსთა სამინისტროს საგამოძიებო დეპარტამენტში მისვლას კიდევ არ აპირებს. საყვარელიძის ინფორმაციით, იგი ვიზიტით უცხოეთში მიემგზავრება, რის გამოც დაკითხვაზე ვერ გამოცხადდება, თუმცა ეს მიზეზი რომ არც ყოფილიყო იგი საგამოძიებო დეპარტამენტში მისვლას მაინც არ აპირებდა. საყვარელიძის განცხადებით, იგი მზადაა მისი მისამართით არსებულ ყველა შეკითხვას საჯაროდ გასცეს პასუხი.
,,საგამოძიებო დეპარტამენტმა, პროკურატურამ პატივი უნდა სცეს პარლამენტის წევრის სტატუსს. Mმინიმუმ უნდა კითხოს, როდის შეუძლია მივიდეს დაკითხვაზე ისე, რომ არ დაემთხვეს საომიტეტო მოსმენას, მივლინებებს. ნამდვილად არ მეშინია და არ ვერიდები ასეთ სისულელეებზე პასუხის გაცემას გამოძიებისთვის, მაგრამ ჩემმა ამომრჩეველმა არ იფიქროს, რომ დავით საყვარელიძე რაიმეში არის გასვრილი მერიაში საქმიანობის დროს, მზად ვარ ყველა შეკითხვას საჯაროდ გავცე პასუხი", - განაცხადა საყვარელიძემ.
შეგახსენებთ, რომ ყოფილი პროკურორი დავით საყვარელიძე რიყის ტერიტორიის გასხვისებასთან დაკავშირებით საგამოძიებო სამსახურში გუშინ იყო დაბარებული, თუმცა იგი დაკითხვაზე არ გამოცხადდა რის შემდეგ საგამოძიებო სამსახურმა დეპუტატი დაკითხვაზე დღეს ხელახლა დაიბარა. მთავარი პროკურორი არ გამორიცხავს, რომ იმ შემთხვევაში თუ საყვარელიძე დაკითხვაზე არ გამოცხადა იგი იძულებით მიიყვანონ.
