დუშეთში CombiMap-ის სუვენირების საწარმო იხსნება. საწარმო, რომელიც დუშეთში სოფელ არაგვისპირშია განთავსებული, დღეს, 13 დეკემბერს, ოფიციალურად გაიხსნება. პროექტი USAID/NEO პროექტის საგრანტო პროგრამის ფარგლებშია დაფინანსებული. ახლად შექმნილი ადგილობრივი სუვენირების საწარმო დაამზადებს მაღალხარისხიან სუვენირებს ქართული ტურისტული ბაზრისთვის და შექმნის ოც ახალ სამუშაო ადგილს.
საწარმოს გახსნას დაესწრებიან USAID მისიის ხელმძღვანელი სტივენ ჰეიკინი, რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი, საქართველოს პარლამენტის რეგიონული პოლიტიკის, თვითმმართველობისა და მაღალმთიანი რეგიონების კომიტეტის თავმჯდომარე ირაკლი ტრიპოლსკი, საქართველოს ტურიზმის ეროვნული ადმინისტრაციის თავმჯდომარე მაია სიდამონიძე და მცხეთა-მთიანეთის გუბერნატორის მოადგილე ნუნუ მღებრიშვილი.
14:00 საათზე აღნიშნული ოფიციალური პირები ასევე დაესწრებიან მულტიმინერალური საკვები ბლოკების გადაცემას დუშეთის მუნიციპალიტეტის სოფელ ბულაჩაურში. სოფელი ბულაჩაური ერთ-ერთია დუშეთისა და თიანეთის იმ ექვსი თემიდან, რომლებიც მძიმედ დააზარალა 2012 წლის ივლისის სეტყვამ. საკვები ბლოკები შეამცირებს იმ ფურაჟის რაოდენობას, რომელიც ესაჭიროებათ ძროხებს და ასევე გაზრდის რძისა და ხორცის წარმოებას. NEO ასევე წამოიწყებს სოფლის მეურნეობის რეაბილიტაციის ორ დამატებით ინიციატივას, რაც მოიცავს სათბურების დამონტაჟებას და სათესლე კარტოფილის დარიგებას. მთლიანობაში, რეაბილიტაციის შემდგომი ეტაპის ფარგლებში გათვალისწინებული დახმარების მეშვეობით მხარდაჭერა გაეწევა 1 617 ოჯახს.