ამერიკელი სენატორები ბიძინა ივანიშვილს პოლიტიკური ანგარიშსწორებისთვის თავის არიდებისკენ მოუწოდებენ. ჟურნალმა "ფორინ პოლისიმ" ღია წერილი გამოაქვეყნა, რომელსაც ხელს აწერენ ჯინ შაჰინი, ჯო ლიბერმანი, ჯეიმს რიში, ლინდსი გრემი და ჯონ მაკკეინი. ისინი საქართველოს პრემიერ-მინისტრს ბიძინა ივანიშვილს მიმართავენ.
სენატორები ყოფილი მაღალჩინოსნების დაკავების ფაქტებით შეშფოთებას გამოთქვამენ. მათი ვარაუდით, ეს არის პოლიტიკურად მოტივირებული ქმედებები ოპოზიციის წინააღმდეგ.
ამერიკელი სენატორები მოუწოდებენ ივანიშვილის მთავრობას, არ გამოიყენოს შერჩევითი სამართალი.
ამავე წერილში ისინი საგარეო საქმეთა მინისტრის მიერ შეერთებულ შტატებში გაკეთებულ იმ კომენტარზეც ამახვილებენ ყურადღებას, როცა ქართველმა დიპლომატმა ყოფილ მაღალჩინოსნებს ბოროტმოქმედები უწოდა. სენატორებს მიაჩნიათ, რომ ბრალეულობას მხოლოდ სასამართლო უნდა წყვეტდეს.
`ჩვენ მივესალმებით თქვენს სიტყვებს, რომელიც გამორიცხავს შერჩევით სამართალს, თუმცა ჩვენ წუხილით აღვნიშნავთ ბოლო დროს განვითარებული მოვლენებით ღრმა შეშფოთებას. განსაკუთრებით შემაშფოთებელი იყო თქვენი საგარეო საქმეთა მინისტრის მაია ფანჯიკიძის კომენტარები იმის თაობაზე, რომ საქართველოს ყოფილი მაღალჩინოსნები `ბოროტმოქმედები და დამნაშავეები` არიან. დანაშაული და უდანაშაულობა უნდა განისაზღვროს მიუკერძოებელი სასამართლოს მიერ და საპირისპირო ძირს უთხრის კანონის უზენაესობას. წლევანდელი საპარლამენტო არჩევნები ეჭვგარეშედ იყო გამყოფი, თუმცა საარჩევნო კამპანია დასრულდა,`- წერენ სენატორები.
