დღეს, 12 დეკემბერს, 15:00 საათზე, საქართველოს კულტურისა და ძეგლთა დაცვის სამინისტროს ინიციატივით, სამინისტროში გაიმართება მრგვალი მაგიდა ეროვნულ ლატარიასთან დაკავშირებით.
16 :00 საათზე კი, საქართველოს კულტურისა და ძეგლთა დაცვის სამინისტროს ინიციატივით, გაიმართება მრგვალი მაგიდა თეატრების კანონპროექტთან დაკავშირებით.
15:00 საათზე განიხილება საქართველოს ეროვნული ლატარიის, კერძოდ, ლატარიის რეალიზებიდან შემოსავლის შესაძლო სამომავლო განაწილების საკითხი კულტურისა და სპორტის სფეროების ხელშეწყობისა და განვითარებისთვის. განხილვის მიზანია რეკომენდაციების შემუშავება და საქართველოს მთავრობისთვის წარდგენა. შეხვედრას საქართველოს კულტურისა და ძეგლთა დაცვის მინისტრი გურამ ოდიშარია, მინისტრის პირველი მოადგილე ალექსანდრე მარგიშვილი, სპორტისა და ახალგაზრდობის საქმეთა, საქართველოს ფინანსთა, ეკონომიკისა და მდგრადი განვითარებისა და იუსტიციის სამინისტროების, ასევე საქართველოს ფოსტის წარმომადგენლები და ხელოვანები დაესწრებიან.
16:00 საათზე შედგება მეოთხე მრგვალი მაგიდა კანონპროექტზე "საქართველოს სახელმწიფო თეატრების შესახებ". საქართველოს კულტურისა და ძეგლთა დაცვის სამინისტროს ინიციატივით შეხვედრაზე განიხილება შესაძლო ცვლილებები კანონში "სახელმწიფო თეატრების შესახებ". საქართველოს პარლამენტის განათლების, მეცნიერებისა და კულტურის კომიტეტის მიერ შემუშავებულ კანონპროექტზე იმსჯელებენ კულტურის კომიტეტის წევრები, თეატრების მმართველები, რეჟისორები, თეატრმცოდნეები, მსახიობები. შეხვედრას ასევე დაესწრებიან საქართველოს კულტურისა და ძეგლთა დაცვის მინისტრი გურამ ოდიშარია, მინისტრის პირველი მოადგილე ალექსანდრე მარგიშვილი, მინისტრის მოადგილე მარინე მიზანდარი.
